12 лютага, Мінск /Кар. БЕЛТА/. Міністр замежных спраў Уладзімір Макей прапанаваў змяніць формулу экспарту Беларусі і пастаўляць палавіну тавараў на рынкі краін ЕАЭС. Аб гэтым ён заявіў, выступаючы на VI Усебеларускім народным сходзе, перадае карэспандэнт БЕЛТА.
Міністр лічыць, што ў сучасных умовах мэтазгодна змяніць формулу экспарту па прынцыпе "трэць - трэць - трэць", калі па трэці паставак прыпадае на Расію і на рынкі ЕАЭС, Еўрасаюз, а таксама краіны далёкай дугі. На яго думку, неабходна сканцэнтраваць палавіну экспарту на рынках ЕАЭС, а астатнюю палавіну падзяліць пароўну паміж ЕС і краінамі далёкай дугі.
"Аб'ектыўна ў знешнепалітычнай дзейнасці любой дзяржавы краіны-суседзі, і тым больш магутныя, маюць пераважнае значэнне. З улікам існуючых інтэграцыйных працэсаў рознага фармату на постсавецкай прасторы, магчыма, было б больш правільна канцэнтраваць да палавіны нашага экспарту менавіта на гэтым вектары, падзяліўшы астатнюю палавіну на два іншыя напрамкі", - прапанаваў міністр.
Ён прызнаў, што гандаль з Захадам з'яўляецца важным, а нярэдка і незаменным складнікам у рабоце эканомікі Беларусі. "Вялікая доля Захаду ў знешнім гандлі Беларусі робіць яго неад'емным элементам у алгарытмах процідзеяння розным знешнім шокам. Гэтаму нас навучылі ўсе папярэднія крызісы", - адзначыў ён.
Беларусь таксама выступае за цеснае партнёрства паміж Еўрасаюзам і ЕАЭС, што, паводле слоў міністра, неабходна не толькі з пункту гледжання развіцця эканомік, але і для мінімізацыі канфліктнага патэнцыялу ў рэгіёне.
"Як бы парадаксальна гэта ні гучала, мы зацікаўлены ў моцным Еўрапейскім саюзе, падтрымліваем моцнае трансатлантычнае партнёрства", - сказаў міністр. Пры гэтым ён нагадаў прадстаўнікам Еўрасаюза, што ўсе пазітыўныя вынікі супрацоўніцтва з Беларуссю былі дасягнуты менавіта ў рамках канструктыўнага дыялогу з дзеючай уладай. "Пры гэтым мы зыходзім з таго, што не можа быць дамінуючай сілы ні ў рэгіёне, ні ў свеце. І ў кожнай дзяржавы павінен быць голас, і ён павінен быць пачуты", - падкрэсліў Уладзімір Макей.-0-
