28 ліпеня, Мінск /Кар. БЕЛТА/. Беларусь і Расія павінны больш кансалідавацца і дыктаваць умовы продажу на міжнародных рынках тых сыравінных тавараў, якія вырабляюць абедзве краіны. Аб гэтым заявіў журналістам губернатар Пермскага края Дзмітрый Махонін па выніках сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
Кіраўнік рэгіёна звярнуў увагу на падабенства эканомік Беларусі і Пермскага края: і там, і там вырабляюцца значныя сусветныя аб'ёмы калію, важнае месца займае нафтаперапрацоўка і машынабудаванне. У час візіту дэлегацыі Пермскага края запланавана рабочая сустрэча з генеральным дырэктарам ААТ "Беларуськалій" Іванам Галаватым. Адказваючы на пытанне, што стане прадметам абмеркавання ў час гэтай сустрэчы, Дзмітрый Махонін сказаў: "Ключавая задача (гэта ўзровень урада Расійскай Федэрацыі, але Пермскі край не можа быць безудзельным) - рабіць так, каб наша прадукцыя, перш за ўсё хлорысты калій, на сусветныя рынкі выходзіла па максімальна эфектыўнай для нашых краін цане. Таму што тыя выклікі, якія стаяць перад Расійскай Федэрацыяй і Рэспублікай Беларусь, яны сведчаць аб тым, што мы павінны яшчэ больш кансалідавацца і ў добрым сэнсе дыктаваць умовы на міжнародных рынках на тыя сыравінныя тавары, якія мы вырабляем. І наша галоўная задача - каб кампаніі кансалідаваліся ў гэтым напрамку. Аб гэтым мы будзем гаварыць".-0-