Ліпецкая вобласць зацікаўлена ў беларускай тэхніцы, супрацоўніцтве ў будаўніцтве жылля і дарог

15 студзеня, Масква /Эдуард Півавар - БЕЛТА/. Ліпецкая вобласць зацікаўлена ў набыцці розных відаў беларускай тэхнікі, супрацоўніцтве з Беларуссю ў будаўніцтве жылля і дарог. Аб гэтым ішла размова на праведзеных у Маскве перагаворах міністра фінансаў Беларусі Юрыя Селіверстава з губернатарам Ліпецкай вобласці Ігарам Артамонавым, паведамляе БЕЛТА са спасылкай на прэс-службу адміністрацыі расійскага рэгіёна.

"Губернатар Ліпецкай вобласці Ігар Артамонаў абмеркаваў з міністрам фінансаў Рэспублікі Беларусь Юрыем Селіверставым перспектыўныя напрамкі гандлёва-эканамічнага партнёрства ў рамках Дня Ліпецкай вобласці на выстаўцы "Расія" ў Маскве. Ліпчане праяўляюць зацікаўленасць у набыцці аўтобуснай і снегаўборачнай тэхнікі беларускай вытворчасці. Яшчэ адзін перспектыўны напрамак супрацоўніцтва - будаўніцтва жылля і аўтамабільных дарог", - адзначылі ў прэс-службе.

"Рэспубліка Беларусь на працягу многіх гадоў уваходзіць у топ-10 асноўных гандлёва-эканамічных партнёраў Ліпецкай вобласці і з'яўляецца вядучым гандлёвым партнёрам сярод краін СНД. Любыя здзяйсненні грунтуюцца на фундаменце дружалюбных адносін і культурнага абмену, таму мы зацікаўлены ва ўмацаванні сувязі паміж ліпчанамі і беларусамі", - сказаў губернатар Ігар Артамонаў.

У Маскве таксама падпісаны два пабрацімскія пагадненні: Валоўская акруга Ліпецкай вобласці заключыла пагадненне з Лёзненскім раёнам Віцебскай вобласці, Ліпецкі раён - з Бярозаўскім раёнам Брэсцкай вобласці.-0-