Фота з архіва
14 лютага, Мінск /Кар. БЕЛТА/. Пляцоўка прамысловых і спажывецкіх тавараў Беларускай універсальнай таварнай біржы (БУТБ) можа быць выкарыстана прадпрыемствамі Калужскай вобласці Расійскай Федэрацыі для рэалізацыі імпартазамяшчальнай прадукцыі ў Беларусь, а таксама для ажыццяўлення паставак у рэгіёны Расіі шляхам заключэння транзітных біржавых здзелак. Аб гэтым паведамілі карэспандэнту БЕЛТА ў прэс-службе БУТБ.
Адпаведная дамоўленасць была дасягнута па выніках сустрэчы з дэлегацыяй калужскіх дзелавых колаў, арганізаванай Гандлёвым прадстаўніцтвам РФ у Беларусі і Цэнтрам падтрымкі экспарту Калужскай вобласці. Так, аб гатоўнасці выйсці на біржавую гандлёвую платформу заявілі калужскія вытворцы абсталявання для водаадвядзення і водаачысткі і пастаўшчыкі запасных частак і камплектуючых для аўтатранспарту. Паводле інфармацыі БУТБ, гэтыя таварныя пазіцыі карыстаюцца стабільным попытам у беларускіх удзельнікаў таргоў, таму з мэтай далейшага пашырэння закупачных магчымасцей айчынных прадпрыемстваў пастаянна вядзецца работа па прыцягненні новых прадаўцоў, у тым ліку з-за мяжы.
"У Калужскай вобласці добра развіты прамысловы сектар, перш за ўсё металаапрацоўка і машынабудаванне. Прадукцыя гэтых галін уваходзіць у лік асноўных артыкулаў несыравіннага экспарту рэгіёна, а біржавыя таргі здольныя забяспечыць непасрэдны доступ да тысяч патэнцыяльных пакупнікоў у Беларусі. Пры гэтым попыт на такія тавары стабільна высокі. Напрыклад, у студзені 2024 года доля абсталявання і механічных частак у структуры здзелак на пляцоўцы прамысловых і спажывецкіх тавараў склала больш як 15 працэнтаў, а наземных транспартных сродкаў і частак рухомага саставу - 26 працэнтаў. Такім чынам, для калужскіх вытворцаў біржа можа стаць альтэрнатыўным інструментам экспартных продажаў, у той час як беларускія кампаніі атрымаюць дадатковую крыніцу закупак у рамках імпартазамяшчэння", - пракаменціравалі ў прэс-службе БУТБ.
Па стане на 1 лютага 2024 года на БУТБ былі акрэдытаваны 24 суб’екты гаспадарання з Калужскай вобласці. У 2023 годзе прадпрыемствы рэгіёна ў асноўным удзельнічалі ў біржавых таргах для закупкі беларускіх піламатэрыялаў.-0-
