Як ідзе падрыхтоўка да будаўніцтва трэцяга энергаблока БелАЭС, расказалі ў Мінэнерга 

11 студзеня, Мінск /Кар. БЕЛТА/. Міністр энергетыкі Дзяніс Мароз расказаў у эфіры тэлеканала "Першы інфармацыйны", як ідзе падрыхтоўка да будаўніцтва трэцяга энергаблока БелАЭС, паведамляе БЕЛТА.

"У адпаведнасці з даручэннем кіраўніка дзяржавы, мы пачалі прапрацоўку пытання рэалізацыі ў Беларусі развіцця атамнай энергетыкі ў выглядзе трэцяга блока на Беларускай атамнай электрастанцыі. Для таго каб пачаць рэалізацыю гэтага праекта, нам неабходна падрыхтаваць пакет дакументаў. Мы пачынаем прапрацоўку пэўнага рамачнага пагаднення з дзяржкарпарацыяй "Расатам", у якім будуць агавораны тэхнічныя і эканамічныя ўмовы рэалізацыі гэтага праекта", - сказаў Дзяніс Мароз.

Міністр адзначыў, што для фарміравання гэтага рамачнага пагаднення створана рабочая група на ўзроўні Міністэрства энергетыкі і дзяржкарпарацыі "Расатам". "Гэта рабочая група правяла ўжо некалькі пасяджэнняў, ідзе дэталёвае абмеркаванне. Кароткатэрміновая задача - падрыхтаваць рамачнае пагадненне, а таксама падрыхтаваць і ўнесці ва ўрад дэталёвы план, які будзе ўключаць у сябе праграму дзеянняў усіх органаў дзяржаўнага кіравання па збудаванні ў краіне атамнага аб'екта ў выглядзе трэцяга блока на БелАЭС. Калі гаварыць пра задачы на 2026 год, то наша задача - гэта сфарміраваць рамачнае пагадненне, падрыхтавацца да падпісання кантракта і заключыць міжурадавае пагадненне паміж Рэспублікай Беларусь і краінай-пастаўшчыком тэхналогій - Расійскай Федэрацыяй - аб збудаванні аб'екта", - адзначыў ён.-0-