25 кастрычніка, Мінск /Кар. БЕЛТА/. Чарговае пасяджэнне Міждзяржаўнага савета па прамысловай бяспецы адбылося 22 кастрычніка ў фармаце відэа-канферэнц-сувязі. Аб гэтым БЕЛТА паведамілі ў прэс-службе Выканкама СНД.
У пасяджэнні ўдзельнічала кіраўніцтва органаў дзяржаўнага нагляду ў галіне прамысловай бяспекі дзяржаў - удзельніц СНД, а таксама прадстаўнікі ЕЭК ААН і Выканаўчага камітэта Садружнасці Незалежных Дзяржаў.
Адкрываючы сустрэчу, намеснік дырэктара Дэпартамента па супрацоўніцтве ў сферы бяспекі і процідзеяння новым выклікам і пагрозам Выканкама СНД Фархат Абдухалыкаў асабліва адзначыў ролю савета ў развіцці інтэграцыйнага супрацоўніцтва на прасторы Садружнасці.
Паводле яго слоў, у дзяржавах, якія ўваходзяць у савет, паслядоўна ажыццяўляецца мадэрнізацыя вытворчасцей, укараняюцца сучасныя тэхналогіі, высокапрадукцыйная і надзейная тэхніка і абсталяванне, што дае магчымасць удасканальваць работу па забеспячэнні прамысловай бяспекі. Вынікі праведзеных у апошнія гады праверак паказваюць зніжэнне парушэнняў правіл і норм тэхнічнай бяспекі прадпрыемстваў усіх форм уласнасці і павышэнне адказнасці кіраўнікоў і ўладальнікаў эксплуатуючых арганізацый.
На думку Фархата Абдухалыкава, работа савета ў многім садзейнічае вырашэнню ў краінах задач па забеспячэнні гарантый бяспекі жыцця і здароўя работнікаў, гатоўнасці эксплуатуючых арганізацый да лакалізацыі і ліквідацыі наступстваў прамысловых аварый.
Рэалізацыя названых напрамкаў будзе садзейнічаць далейшаму канструктыўнаму абмену вопытам, умацаванню ўзаемавыгаднага супрацоўніцтва краін - членаў МСПБ, пошуку новых сучасных метадаў і механізмаў сумеснага выкарыстання папераджальных мер і аварыйна-выратавальных сіл і сродкаў, упэўнены намеснік дырэктара дэпартамента.
На сустрэчы прадстаўнікі краін СНД абмеркавалі чатырнаццаць пытанняў. У прыватнасці, былі падведзены папярэднія вынікі работы савета за 2020-2021 гады, адбыўся абмен інфармацыяй аб змяненнях за апошні год у заканадаўстве дзяржаў - членаў савета ў галіне рэгулявання прамысловай бяспекі на небяспечных вытворчых аб'ектах і дзейнасці ў гэтым напрамку.
Удзельнікі пасяджэння зацвердзілі план асноўных мерапрыемстваў па рэалізацыі Пагаднення аб супрацоўніцтве ў галіне забеспячэння прамысловай бяспекі на небяспечных вытворчых аб'ектах на 2021-2026 гады, абмеркавалі тэмы, якія датычацца нарматыўнага рэгулявання пытанняў бяспекі абсталявання, якое працуе пад празмерным ціскам, работы з кадрамі, забеспячэння прамысловай бяспекі ліфтавай гаспадаркі, а таксама шэраг іншых пытанняў.-0-
