20 чэрвеня, Мінск /Кар. БЕЛТА/. Еўрапейскі банк рэканструкцыі і развіцця прадаўжае перагаворы з урадам Беларусі па ўваходжанні ў капітал Белінвестбанка, паведаміў кіраўнік прадстаўніцтва ЕБРР у Беларусі Аляксандр Піваварскі на семінары "(Пера)ацэнка ролі дзяржаўных прадпрыемстваў у Цэнтральнай, Усходняй і Паўднёва-Усходняй Еўропе", перадае карэспандэнт БЕЛТА.
"Мы вядзём перагаворы з урадам. Ідэя ў тым, што мы цяпер падышлі да таго, што банк у прынцыпе гатовы, каб мы маглі яго разглядаць як аб'ект для перадпрыватызацыйнага ўваходжання. Цяпер паўстае пытанне цаны, колькі гэта будзе каштаваць і нам, і краіне", - сказаў Аляксандр Піваварскі.
Паводле яго слоў, ЕБРР бачыць галоўнай мэтай падрыхтаваць банк, каб ён мог прыцягнуць з часам добрага глабальнага іграка ў якасці інвестара. "Будем прадаўжаць размову з урадам з надзеяй, што мы зможам дамовіцца і ўвайсці (у капітал. - Заўвага БЕЛТА), але гэта не самамэта. Мэта - каб банк прыцягнуў інвестара, для гэтага ёсць і іншыя метады", - дадаў кіраўнік прадстаўніцтва ЕБРР.
ААТ "Белінвестбанк" - адзін з буйнейшых сістэмаўтваральных банкаў Беларусі. Па аб'ёме актываў і рэсурснай (кліенцкай) базы ўваходзіць у шасцёрку лідараў. Пачынаючы з 2015 года ў банку рэалізуецца Праграма інстытуцыянальнага развіцця, накіраваная на павышэнне яго эфектыўнасці і камерцыялізацыю. Гэта праграма ажыццяўляецца пры падтрымцы Еўрапейскага банка рэканструкцыі і развіцця.
ЕБРР - шматбаковы банк, які садзейнічае развіццю прыватнага сектара і прадпрымальніцкай ініцыятывы ў 38 эканоміках на трох кантынентах. Еўрапейскі банк рэканструкцыі і развіцця з'яўляецца буйнейшым інстытуцыянальным інвестарам у эканоміку Беларусі. З пачатку сваёй дзейнасці ў Беларусі ў 1992 годзе ЕБРР інвесціраваў амаль 2,46 млрд еўра ў 114 праектаў у розных галінах эканомікі краіны.-0-
