30 красавіка, Мінск /Кар. БЕЛТА/. Беларуская эканоміка аднавілася і прадэманстравала ў I квартале ў параўнанні з аналагічным перыядам мінулага года рост ВУП на 0,9 працэнта. Прагназуецца, што за першае паўгодзе ВУП павялічыцца на 1,5-1,8 працэнта. Такія лічбы змешчаны ў эканамічным аглядзе міністра эканомікі Аляксандра Чарвякова, падрыхтаваным для "Экономической газеты", паведамілі БЕЛТА ў прэс-службе ведамства.
У сакавіку беларуская эканоміка прадоўжыла расці. У параўнанні са студзенем - лютым тэмп росту ВУП паскорыўся на 0,1 працэнта, прырост за I квартал - 0,9 працэнта. Эканоміка спрацавала лепш, чым меркавалася - раней Міністэрства эканомікі прагназавала захаванне аб'ёму ВУП на ўзроўні I квартала 2020 года.
"Эфект параўнання з нізкай базай мінулага года мае рознанакіраваны характар. З аднаго боку, у гэты перыяд COVID-19 яшчэ практычна не аказваў уплыву на эканоміку краіны. З іншага - негатыўна ўздзейнічалі іншыя знешнія фактары (нізкія аб'ёмы паставак нафты і адсутнасць калійных кантрактаў). Улічваючы невялікае зніжэнне ВУП у мінулым годзе (0,9 працэнта), гэта сігнал, што эканоміка пераходзіць з фазы аднаўлення да росту. Прычым без макраэканамічных дысбалансаў. Аднаўленне эканамічнай актыўнасці пачалося з III квартала 2020 года. Гэтаму садзейнічалі рашэнні ўрада не спыняць эканоміку, а таксама меры падтрымкі ўказаў нумар 143, нумар 178 і іншых. Як вынік, працуючыя прадпрыемствы сталі той базай, якая дала магчымасць пачацца аднаўленчаму росту і выкарыстоўваць у поўнай меры паляпшэнне знешняй кан'юнктуры, звязанае са змякчэннем антыкавідных мер у нашых гандлёвых партнёраў. Адзначым, галіны спрацавалі без правалаў, франтальна, унеслі свой уклад у фарміраванне валавой дабаўленай вартасці (ВДВ)", - падкрэсліў Аляксандр Чарвякоў.
Асноўным драйверам росту выступае прамысловасць (109,2 працэнта). Высокія тэмпы забяспечаны не толькі за кошт сыравіннага сектара (нафтаперапрацоўка - 147,1 працэнта, калійныя ўгнаенні - 142,9 працэнты), але і галін, што вырабляюць інвестыцыйныя тавары. Павелічэнне выпуску назіраецца па ўсім спектры асноўных відаў прадукцыі.
За I квартал паскорыўся рост ВДВ прадукцыі машынабудавання (117,8 працэнта). Павялічылася вытворчасць уборачных машын, пагрузчыкаў, кар'ерных самазвалаў, трактароў. Прадаўжае ўстойліва развівацца хімічны комплекс, у тым ліку за кошт паскоранай вытворчасці лекавых сродкаў.
Дынамічнаму росту валавой дабаўленай вартасці электраабсталявання (на 11,4 працэнта) садзейнічала вытворчасць бытавых халадзільнікаў і маразільнікаў, пральных машын, электрычных убудавальных панэлей.
"Станоўчы імпульс эканоміцы ў I квартале надаў фактар надвор'я, што забяспечыла дадатковы попыт на энергетычныя тавары. Акрамя таго, рост прамысловай вытворчасці абумовіў павелічэнне спажывання электраэнергіі і цяпла. Іншымі словамі, рост назіраецца менавіта ў тых галінах, якія вызначаны драйверамі эканамічнага росту ў новай пяцігодцы. Важна падкрэсліць, што ўзровень складскіх запасаў на 1 красавіка (61,2 працэнта) знаходзіцца на самай нізкай адзнацы з 2013 года. На экспарт пастаўлена больш за 60 працэнтаў прадукцыі прамысловасці. Яшчэ адзін сегмент, на які робіцца стаўка і дзе мы не поўнасцю рэалізуем патэнцыял, - перапрацоўка мясцовай сыравіны, у тым ліку сельскагаспадарчай", - адзначыў міністр эканомікі.
Паводле яго слоў, пандэмія ў меншай ступені паўплывала на вытворчасць харчовых прадуктаў (+1,6 працэнта за квартал). Павялічылася вытворчасць каўбасных вырабаў, алеяў, сыроў цвёрдых.
"Гаворачы аб галіне ў цэлым, нельга не адзначыць яе сезонны характар. Напрыклад, у цукровай галіне, развіццё якой залежыць ад пары года і сітуацыі на сусветных рынках. Цяпер сусветныя доларавыя цэны на цукар больш як на 30 працэнтаў перавышаюць узровень сакавіка мінулага года. Гэта звязана са зніжэннем прапанавання цукру ў бягучым сезоне. Пры такой дынаміцы фінансавы стан нашых цукраперапрацоўчых прадпрыемстваў будзе паступова аднаўляцца, - расказаў Аляксандр Чарвякоў. - Палепшыліся фінансавыя паказчыкі прамысловай галіны. Рэнтабельнасць продажаў - 8,2 працэнта, што на 0,6 працэнта вышэй за ўзровень студзеня-лютага 2020 года. Чысты прыбытак склаў Br815 млн, у той час як у студзені - лютым мінулага года ён быў адмоўны (мінус Br1,3 млрд)".
На ўстойлівы характар станоўчага трэнду ў прамысловасці ўказваюць вынікі апошніх апытанняў кіраўнікоў прампрадпрыемстваў, рэгулярна праводзімых НДЭІ Мінэканомікі. Рэспандэнты пазітыўна бачаць бліжэйшую перспектыву з пункту гледжання попыту на прадукцыю, загрузкі вытворчых магутнасцей і гэтак далей. Пазітыўная дынаміка ў многім тлумачыцца "цыклічным" аптымізмам пасля значнага спаду ў мінулым годзе. Наяўнасць партфеля заказаў дазваляе планаваць захаванне бягучага ўзроўню занятасці. Большасць рэспандэнтаў (80 працэнтаў) лічаць, што ў бліжэйшы час колькасць занятых на прадпрыемствах не зменіцца. Пры гэтым колькасць удзельнікаў апытання, якія чакаюць павелічэння колькасці занятых, перасягае ўдзельнікаў, якія чакаюць скарачэння (14 працэнтаў супраць 5 працэнтаў).-0-
