10 лістапада, Мінск /Кар. БЕЛТА/. Беларускім вытворцам ва ўмовах пандэміі трэба шукаць новыя спосабы прасоўвання прадукцыі АПК. Такое меркаванне выказаў намеснік кіраўніка спраў Прэзідэнта Андрэй Свірыдаў у час пленарнага пасяджэння дзелавога форуму на 26-й Міжнароднай спецыялізаванай аптовай выстаўцы-кірмашы "Прадэкспа", перадае карэспандэнт БЕЛТА.
"Нягледзячы на складаную эпідэміялагічную сітуацыю ва ўсім свеце, харчовая галіна прадаўжае развівацца. Але COVID-19 прымушае нас змяняць фарматы правядзення традыцыйных мерапрыемстваў. Падыход да выставачнай і рэкламнай дзейнасці зведвае пэўныя змяненні. Многія мерапрыемствы праводзяцца дыстанцыйна, арганізуюцца ў фармаце анлайн. Хацелася б, каб вытворцы харчовай прадукцыі ў гэтых умовах па-новаму глянулі на падыходы да прасоўвання сваёй прадукцыі, свайго брэнда", - сказаў Андрэй Свірыдаў.
Намеснік кіраўніка спраў Прэзідэнта звярнуў увагу на высокую значнасць інтэрнэт-камунікацый, сацыяльных сетак. "Раней было так: заключыў кантракты на выстаўцы і па іх ацэньваеш сваю эфектыўнасць. Але цяпер старых маркетынгавых падыходаў недастаткова. Кожны вытворца павінен знаходзіць новыя шляхі прасоўвання тавараў не толькі на нашым рынку, але і на экспарт, новыя спосабы пазіцыянавання, замацавання брэнда", - падкрэсліў ён.
Выстаўка-кірмаш "Прадэкспа" праходзіць у Мінску з 10 па 13 лістапада. У час выстаўкі арганізаваны дзелавы форум "Стратэгічныя перспектывы развіцця харчовай прамысловасці Беларусі", які сабраў прадстаўнікоў зацікаўленых ведамстваў, кіраўнікоў вядучых прадпрыемстваў харчовай сферы. Запланаваны таксама кангрэс вытворцаў і гандлёвых сетак, дэгустацыйны конкурс, кулінарны кубак і прафесійны форум хлебапёкаў і кандытараў "Міжнародны хлебны салон". У праграме і прэзентацыі, майстар-класы, інтэрактыўныя шоу.-0-
