24 мая, Мінск /Кар. БЕЛТА/. Дарожная карта мерапрыемстваў па замяшчэнні няякаснай нафты з РФ канчаткова ўзгоднена беларускім і расійскім бакамі, паведамілі карэспандэнту БЕЛТА ў канцэрне "Белнафтахім".
"Віцэ-прэм'ер Беларусі Ігар Ляшэнка і расійскі віцэ-прэм'ер Дзмітрый Козак узгаднілі дарожную карту тэхнічных мерапрыемстваў, што дазваляюць замясціць у беларускай частцы трубаправода "Дружба" нафту, якая мае ў саставе хлорарганіку, на чыстую і аднавіць транзітную транспарціроўку нафты ў заходнім напрамку", - паведамілі ў канцэрне.
У перагаворах таксама ўдзельнічалі прадстаўнікі канцэрна "Белнафтахім" і Мінэнерга РФ.
"Плануецца, што ад дакументарнай да практычнай рэалізацыі карты бакі пяройдуць з 24 мая", - дадалі ў "Белнафтахіме".
Як паведамлялася, канцэрн "Белнафтахім" 19 красавіка заявіў аб рэзкім пагаршэнні якасці расійскай нафты Urals, якая паступае транзітам ва ўчастак магістральнага нафтаправода ААТ "Гомельтранснафта Дружба". Колькасць у саставе нафты хлорарганічных злучэнняў перавышала ў дзясяткі разоў гранічныя значэнні па стандарце. Абодва беларускія нафтаперапрацоўчыя заводы - Мазырскі НПЗ і ААТ "Нафтан" - былі вымушаны знізіць загрузку магутнасцей і панеслі страты. "Нафтан" і цяпер загружаны на 65 працэнтаў. Сістэма нафтаправода "Дружба" забяспечвае пастаўкі нафты на беларускія НПЗ і транзіт нафты ў Еўропу праз Беларусь па двух напрамках - праз Польшчу і Украіну.-0-
