11 мая, Магілёў /Кар. БЕЛТА/. Цэны на агародніну ўжо з бягучага месяца будуць зніжацца. Аб гэтым заявіў міністр антыманапольнага рэгулявання і гандлю Аляксей Багданаў, перадае карэспандэнт БЕЛТА.
З умацаваннем беларускага і расійскага рубля цэны на агародніну будуць зніжацца. "Да таго ж атрымаем новы ўраджай. Агародніна будзе таннець, паколькі самі будзем вырошчваць больш агародніны", - адзначыў міністр.
Паводле слоў міністра, сакавік у пытаннях цэн на прадукты быў не самым простым месяцам. "Сакавік быў нестандартным месяцам, цярпела, у прынцыпе, усё, не толькі цэны на агародніну і садавіну. І ў сакавіку мы адчулі ўвесь эфект ад ускладнення і падаражэння лагістыкі, закрыцця граніц, - адзначыў ён. - Гэта ўсё ў комплексе паўплывала на цану імпартных тавараў. Але для нашых пакупнікоў заўсёды быў выбар: жадаеш - купляй даражэйшыя імпартныя тавары, жадаеш - што было закладзена ў стабілізацыйныя фонды. Сёння ўсё гэта ёсць у магазінах".
У параўнанні з сакавіком сітуацыя з коштам асобных відаў фруктаў значна змянілася ў красавіку. Аляксей Багданаў прывёў у прыклад цэны на асобныя віды фруктаў: кошт цытрусавых знізіўся на 8 працэнтаў, бананы ўпалі ў цане на 9 працэнтаў. А рост цэн быў звязаны з імпартам тавараў новага ўраджаю.
У наступным сезоне, на 2022-2023 год, у Беларусі будуць павялічаны аб'ёмы закладкі стабфондаў. "Прыменім крыху іншы механізм, які дазволіць яшчэ больш разгарнуць аб'ём уласнай агародніны і садавіны, асабліва папулярнага ў нашага насельніцтва "баршчовага набору", каб хапіла да новага ўраджаю. На 30-40 працэнтаў павялічым аб'ёмы закладкі па шэрагу таварных груп. Мы правялі паглыблены аналіз з улікам сітуацыі 2021 года і на падставе гэтага зробім карэкціроўкі па стабфондах", - адзначыў ён.-0-
