21 лютага, Магілёў /Кар. БЕЛТА/. Тэхніку для прасавання лубяных культур пачнуць выпускаць у ААТ "Кіруючая кампанія холдынга "Бабруйскаграмаш" у гэтым годзе. Аб гэтым карэспандэнту БЕЛТА расказала генеральны дырэктар холдынга Надзея Лазарэвіч.
"Машына для лубяных культур будзе стварацца на базе ўжо існуючага прэс-падборшчыка для лёну. Пастаўляцца яна будзе выключна за мяжу. Ужо вызначаны рынкі збыту новай тэхнікі - Расія і Украіна", - адзначыла гендырэктар.
Прэзентаваць новы экзэмпляр сельскагаспадарчай тэхнікі плануецца на выстаўцы "Белагра", якая пройдзе ў Мінску 2-6 чэрвеня.
Акрамя таго, "Бабруйскаграмаш" у бягучым годзе плануе павялічыць аб'ёмы вытворчасці энерганасычанай тэхнікі. "Цяпер нашы вобласці закупляюць менавіта энерганасычаную сельскагаспадарчую тэхніку і ім патрэбна прычапное абсталяванне большага памеру. Гэтаму напрамку дзейнасці мы ўдзяляем асаблівую ўвагу і нарошчваем гаму абсталявання, якое неабходна для эфектыўнай работы з больш магутнымі трактарамі", - падкрэсліла Надзея Лазарэвіч.
Яна дадала, што сельскагаспадарчая тэхніка, вырабленая холдынгам, працуе больш як у 50 краінах свету. Машыны беларускай вытворчасці дапамагаюць аграрыям у Еўропе, Азіі, Афрыцы, Паўночнай, Цэнтральнай і Паўднёвай Амерыцы. У гэтым годзе плануецца асвоіць рынкі Егіпта, Ізраіля, Сербіі і Сірыі.
ААТ "Кіруючая кампанія холдынга "Бабруйскаграмаш" вырабляе больш як 150 найменняў сельскагаспадарчай тэхнікі. Цяпер у склад холдынга ўваходзіць ККХ "Бабруйскаграмаш", "Бабруйсксельмаш", "Оршааграпраммаш", "Тэхналіт Полацк", Маладзечанскі станкабудаўнічы завод і "НДІстромаўталінія". У бягучым годзе са складу холдынга выйдзе "Тэхналіт Полацк" , на яго месца прыйдзе Брэсцкі электрамеханічны завод.-0-
