23 снежня, Мінск /Кар. БЕЛТА/. Адзіная база біржавой інфармацыі можа быць створана ў СНД. З такой прапановай выступіў старшыня праўлення Беларускай універсальнай таварнай біржы Аляксандр Асмалоўскі падчас пасяджэння Камітэта па таварных рынках пры Міжнароднай асацыяцыі біржаў краін Садружнасці Незалежных Дзяржаў (МАБ СНД), якое адбылося ў Санкт-Пецярбургу, паведамілі БЕЛТА ў прэс-службе БУТБ.
"Працэсы дэглабалізацыі і рэгіяналізацыі прадаўжаюць аказваць значны ўплыў на развіццё біржавых таварных рынкаў ва ўсім свеце, у тым ліку садзейнічаючы пашырэнню "інфармацыйнага разрыву" паміж краінамі Захаду і СНД. У гэтых умовах надзённай задачай для біржаў Садружнасці становіцца фарміраванне ўласных цэнавых арыенціраў, якія будуць служыць асновай для прыняцця ўзважаных рашэнняў і выпрацоўкі аптымальнай цэнавай палітыкі ўдзельнікамі біржавых таргоў. Каб рушыць наперад у вырашэнні гэтага пытання, неабходна ўжо цяпер пачынаць акумуляваць цэнавыя даныя па ключавых таварных пазіцыях на біржах краін СНД. У перспектыве гэта дасць магчымасць стварыць адзіны міжбіржавы інфармацыйны рэсурс, запатрабаваны ў маштабах Садружнасці", - сказаў Аляксандр Асмалоўскі.
Ён таксама адзначыў, што пэўныя практычныя крокі па стварэнні адзінай міжбіржавой базы даных ужо робяцца сумесна з Санкт-Пецярбургскай міжнароднай таварна-сыравіннай біржай. "Пакуль што мы працуем у двухбаковым фармаце: аналізуем таварныя пазіцыі, прадстаўленыя на нашых пляцоўках, шукаем агульныя падыходы, стараемся выпрацаваць адзіную метадалогію і падыходы да разліку каціровак, індэксаў і іншых цэнавых індыкатараў. Зразумела, не ўсё так проста, як хацелася б, але, безумоўна, мы на правільным шляху. Таму запрашаем усіх зацікаўленых далучыцца да гэтага праекта і ўнесці сваю лепту ў яго рэалізацыю. Поспех гэтай ініцыятывы залежыць непасрэдна ад ступені ўключанасці кожнай біржы, якая ўваходзіць у МАБ. Давайце аб'ядноўваць намаганні", - падкрэсліў кіраўнік БУТБ.
МАБ СНД - міжнародная некамерцыйная арганізацыя са штаб-кватэрай у Маскве. Аб'ядноўвае таварныя і валютна-фондавыя біржы з 10 краін. БУТБ з'яўляецца паўнапраўным членам МАБ СНД і ініцыятарам стварэння камітэта па таварных рынках пры гэтай арганізацыі. У цяперашнім пасяджэнні камітэта прынялі ўдзел кіраўнікі найбуйнейшых біржавых пляцовак Беларусі, Расіі, Казахстана і Узбекістана.
ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
