4 лютага, Мінск /Кар. БЕЛТА/. Дзяржаўная праграма "Культура Беларусі" на 2021-2025 гады зацверджана пастановай Савета Міністраў ад 29 студзеня 2021 года нумар 53, паведамляе БЕЛТА са спасылкай на Нацыянальны прававы інтэрнэт-партал.
На рэалізацыю дзяржпраграмы спатрэбіцца Br4 млрд. Дакумент прыняты ў мэтах стварэння ўмоў для эфектыўнага функцыянавання сеткі арганізацый культуры і актыўнага ўключэння грамадзян Беларусі ў культурнае жыццё краіны.
Дзяржпраграма ўключае пяць падпраграм: "Культурная спадчына", "Мастацтва і творчасць", "Функцыянаванне і інфраструктура сферы культуры", "Беларусы ў свеце", "Архівы Беларусі".
Сярод мерапрыемстваў - правядзенне фестываляў, конкурсаў, форумаў, выставак, пленэраў, свят і іншых культурных мерапрыемстваў, стварэнне і абнаўленне тэатральных пастановак, канцэртных праграм, цыркавых паказаў, правядзенне гастролей, арганізацыя і правядзенне культурных праграм міжнародных форумаў, выстаў, кірмашоў.
У плане таксама абазначана рэстаўрацыя Нацыянальнага мастацкага музея, рэканструкцыя і рэстаўрацыя помнікаў архітэктуры - касцёла Божага Цела ў Нясвіжы, Спаса-Праабражэнскай царквы ў Полацку, палаца ў Косаўскім палацава-паркавым ансамблі, палацава-паркавага ансамбля ў вёсцы Жылічы Кіраўскага раёна, палацавага комплексу ў Ружанах і інш. Для ўстаноў адукацыі і арганізацый у сферы культуры закупяць музычныя інструменты.-0-
