29 ліпеня, Мінск /Кар. БЕЛТА/. Выстава керамікі і шкла "Пласт-21" адкрылася ў Палацы мастацтва 29 ліпеня, паведамілі БЕЛТА ў Беларускім саюзе мастакоў.
У экспазіцыі прадстаўлена больш за 50 пластоў, створаных ужо вядомымі мастакамі і студэнтамі мастацкіх навучальных устаноў краіны. У адрозненне ад звыклых выстаў дэкаратыўнага мастацтва, калі ў адной экспазіцыі аб'ядноўваюцца розныя формы, жанры, функцыі і матэрыялы, новы праект вылучае толькі адзіны яркі напрамак - пласты з керамікі і шкла.
Прафесійных мастакоў, прадстаўнікоў некалькіх пакаленняў выхаванцаў розных прафесійных школ, аб'ядноўвае ў экспазіцыі любоў да керамічных паверхняў - пластоў, любоў да агню і эксперыменту. "Сёння кераміка як від мастацтва знаходзіцца ў трэндзе і прыцягвае да сябе вялікую колькасць аматараў. Таму гледачам будзе цікава паглядзець, як працуюць з матэрыялам мастакі розных пакаленняў і школ. Выстава керамікі і шкла, як правіла, гэта мікс форм - на нашай выставе мы абмяжоўваем удзельнікаў "плоскасцю", - адзначыла куратар праекта мастак Вольга Сямашка.
"Пласты - гэта асаблівы жанр у мастацтве керамікі. Яны могуць быць вертыкальнымі, гарызантальнымі, мець любую форму, могуць стаць галоўным персанажам і цэнтрам кампазіцыі або месцам для гульні ліній і колераў. Межаў для мастакоў няма: фактуры, тэкстуры, размалёўка, жывапіс, рэльеф, - вось мова керамічнага палатна. Пэндзлі, стэкі і фантазія - інструменты мастака-кераміста для работы з глінянай паверхняй. З дапамогай плям і ліній, фармальных кампазіцый, абстракцый або даволі рэалістычных мастацкіх матываў у апавядальнай або асацыятыўнай рытміцы мастак увасабляе свае ўражанні і ўспаміны, але заўсёды гэта эмоцыі, якія ён "выкладае" на гліняны пласт, дзе яны ў выніку абпалу з пластычных становяцца цвёрдымі", - расказвае першы намеснік старшыні Беларускага саюза мастакоў мастацтвазнавец Наталля Шаранговіч.
Магчымасць злучэння рэльефу і колеру робіць керамічныя пласты ўнікальным жанрам у мастацтве. "Паверхні керамічнага пласта складаныя, за гэта і любяць керамісты гэты жанр. Нехта малюе на іх палачкай, нехта пэндзлікам і стэкам, нехта згортвае краі і выгінае пласт, задаючы яму патрэбную пластыку. Кераміка, загартаваная ў агні, вельмі моцны матэрыял, але пры гэтым яна вельмі далікатная, з-за чаго і адносіны да яе ў мастака асаблівыя - хвалюючыя, паважлівыя", - дадалі арганізатары.
Акрамя прызнаных зорак керамікі і шкла, такіх як Наталля Яўглеўская, Эмілія Фокіна, Тамара Васюк, Аляксандр Зіменка, Аляксандра Дзятлава, Вольга Сазыкіна, Валерый Калтыгін, Вольга Сямашка, Ганна Амбросава, Алена Чэпелева, Жанна Марозава, у выставе прымаюць удзел маладыя аўтары і нават студэнты.-0-
