9 верасня, Мінск /Кар. БЕЛТА/. Часовая экспазіцыя "Адным дыханнем з Ленінградам" адкрылася 8 верасня ў Беларускім дзяржаўным музеі гісторыі Вялікай Айчыннай вайны, перадае карэспандэнт БЕЛТА.
Выстава праз 80 гадоў з дня пачатку блакады Ленінграда даносіць гісторыю трагедыі і мужнасці людзей таго часу. Экспанаты расказваюць аб тым, як каля 900 дзён і начэй горад жыў і змагаўся ва ўмовах варожай асады, пераадольваючы голад, холад, варварскія абстрэлы і бамбёжкі, масавую гібель людзей.
Паводле слоў загадчыка аддзела ваенна-франтавой гісторыі Святланы Прыбыш, у аснову экспазіцыі пакладзена "Блакадная кніга", напісаная беларускім пісьменнікам Алесем Адамовічам і рускім аўтарам Даніілам Граніным. Выданне змяшчае 200 гісторый блакаднікаў.
"Нашу выставу мы вырашылі пабудаваць з успамінаў гэтых людзей. Усё праілюстравана фатаграфіямі. Прадстаўлены і копіі пісем, якія пісалі аўтарам пасля выхаду першых кніг. Яны змяшчаюць дапаўненні і ўспаміны людзей аб тым, як яны перажылі блакаду. Многія хацелі падзяліцца сваімі гісторыямі і асабістым болем", - дадала яна.
"Экспазіцыя - гэта жывая памяць, якая патрэбна ўсім нам, каб дакрануцца да той гісторыі: убачыць пакуты, голад, холад і адчуць той боль, які перанеслі жыхары блакаднага Ленінграда ў гады вайны", - падкрэсліла намеснік дырэктара па навуковай рабоце Ганна Галінская.
У экспазіцыі выкарыстаны фотадакументальныя матэрыялы з фондаў музея Вялікай Айчыннай вайны, Дзяржаўнага музея абароны і блакады Ленінграда і Цэнтральнага дзяржаўнага архіва літаратуры і мастацтва Санкт-Пецярбурга.
"Выстава адкрываецца ў самы трагічны дзень для ленінградцаў і мае назву "Адным дыханнем з Ленінградам" - гэта радкі з верша Вольгі Бергольц, якія прымяняльныя да экспазіцыі ў тым сэнсе, што адным дыханнем з Ленінградам жыве ўся краіна і былыя рэспублікі Савецкага Саюза, у прыватнасці Беларусь. Мы былі шчаслівыя прадаставіць фатаграфіі з фонду нашага музея для такой выставы", - падкрэсліла ў сваім відэазвароце кіраўнік аддзела спецпраектаў і сувязей з грамадскасцю Дзяржаўнага музея абароны і блакады Ленінграда Святлана Касцішына.
Выстава будзе працаваць да 30 верасня.-0-
