30 сакавіка, Віцебск /Кар. БЕЛТА/. Фінал танцавальнага праекта Dream Dance Fest адбудзецца ў фармаце гала-канцэрта ў ліпені ў час ХХХ Міжнароднага фестывалю мастацтваў "Славянскі базар". У Віцебск прыедуць мацнейшыя калектывы з Беларусі, выбар прадстаўнікоў з іншых краін адбудзецца ў бліжэйшы час, паведамілі БЕЛТА ў дырэкцыі фестывалю.
Танцавальны праект на музычным форуме пройдзе трэці раз. У гэтым годзе за права атрымаць пуцёўку ад Беларусі на фестываль змагаліся больш за 2,2 тыс. танцораў, але ў Віцебск быў запрошаны толькі 21 калектыў. "У нацыянальным адборачным туры прынялі ўдзел танцавальныя калектывы з усіх абласцей. У праграме былі прадстаўлены групы ўсіх узростаў, уключаючы катэгорыю 50+. Самаму малодшаму ўдзельніку зусім нядаўна споўнілася 3 гады, а самаму старэйшаму - 73", - адзначылі ў дырэкцыі.
"Славянскі базар" у Віцебску пройдзе з 14 па 19 ліпеня. Урачыстая цырымонія адкрыцця фестывалю адбудзецца 15 ліпеня, закрыцця - 18-га. У фестывальныя дні пройдуць дарослыя і дзіцячыя песенныя конкурсы. Таксама гасцей чакаюць традыцыйныя канцэрты ў Летнім амфітэатры, спектаклі, фэст вулічнага мастацтва "На сямі вятрах" і іншыя мерапрыемствы.-0-
