20 лістапада, Брэст /Кар. БЕЛТА/. У Брэсцкім акадэмічным тэатры драмы рыхтуюць прэм'еру музычнага спектакля для дарослых "З першым снегам!", паведамілі карэспандэнту БЕЛТА ў тэатры.
Гэта сумесны праект БАТД і творчага аб'яднання Love Concert. Арыгінальны сцэнарый да пастаноўкі напісалі Ігар і Ірына Пашэчкі. Гледача чакае музычная рамантычная гісторыя, заснаваная на рэальных падзеях. У аснове сюжэта - сустрэча пасталеўшых сяброў дзяцінства, якія перажываюць своеасаблівы крызіс сярэдняга ўзросту. У кожнага свае клопаты, праблемы, няздзейсненыя мары. У першыя дні зімы іх жыццёвыя шляхі зноў перасякаюцца, а навагодняя ноч падносіць нечаканыя павароты і сюрпрызы.
"Ідэя праекта нарадзілася некалькі гадоў таму. Справа ў тым, што звычайна навагоднія тэатральныя пастаноўкі ставяць для дзяцей, а нам захацелася зрабіць такую для дарослых. Мы пачалі пісаць і збіраць у адну гісторыі, сітуацыі са свайго жыцця і жыцця нашых сяброў. Часам яны могуць здацца неверагоднымі, але фактычна ўсё, пра што расказваецца ў гэтым спектаклі, было на самай справе", - расказаў адзін з аўтараў праекта Ігар Пашэчка.
У пастаноўцы заняты артысты тэатра і творчай кампаніі Love Concert. Прагучаць аўтарскія музычныя кампазіцыі і кавер-версіі папулярных хітоў. Рэжысёр спектакля - Вольга Клімук, мастак-пастаноўшчык - Мікалай Палтарака, мастак па касцюмах - Аксана Марусяк.
Акрамя таго, аўтары праекта рыхтуюць музычны пастскрыптум "З першым снегам! P.S.". Гэта фармат вечара ў тэатральным бары, у якім прагучаць песні з аднайменнага спектакля, а таксама ўсімі любімыя зімовыя і навагоднія хіты.
"Мы вельмі спадзяёмся на тое, што пастаноўка будзе паспяховай і знойдзе водгук у гледача. Працуем цесна, кожны дзень. Вельмі ўдзячны калектыву тэатра, усёй нашай вялікай камандзе за гэту сумесную творчасць у такі няпросты час", - адзначыў Ігар Пашэчка.
Прэм'ера музычнага спектакля, які мае ўзроставае абмежаванне "16+", запланавана на 2 снежня.-0-
