8 снежня, Мінск /Кар. БЕЛТА/. Новы праект выдавецтва "Мастацкая літаратура", прысвечаны беларускім пісьменнікам, заснаваны на густах чытачоў. Аб гэтым расказаў сёння журналістам дырэктар выдавецтва Аляксандр Бадак, перадае карэспандэнт БЕЛТА.
"У наступным годзе нам спаўняецца 50 гадоў. Праглядаючы бібліяграфію нашага выдавецтва за гэтыя гады, аказалася, што яшчэ не было такога, каб за год у мастацкай літаратуры не выходзіў хоць адзін том, прысвечаны беларускім пісьменнікам. Зборнікі твораў, на жаль, цяпер не карыстаюцца такой папулярнасцю, як, скажам, у 1980-я гады, аднак "Мастацкая літаратура" прадаўжае традыцыю. Мы пачалі паралельна новы праект з падборкай выбраных твораў беларускіх пісьменнікаў", - адзначыў Аляксандр Бадак.
Дырэктар выдавецтва расказаў, што перад стартам праекта яны звярнуліся да чытачоў з просьбай назваць любімыя творы айчынных аўтараў. "Наша першая кніга прысвечана Максіму Багдановічу. Нам нават давялося рабіць дадатковы тыраж кнігі, таму што першы хутка разышоўся. З'явіліся і два тамы Васіля Быкава", - сказаў ён.
У планах у "Мастацкай літаратуры" выпуск выбраных твораў Янкі Купалы, Якуба Коласа, Уладзіміра Караткевіча.
"У нас таксама ёсць праекты, прысвечаныя дзецям і падлеткам. У серыю "100 пытанняў пра Беларусь" увайшлі 10 кніг, якія змяшчаюць цікавыя факты і адказы на пытанні пра краіну. Хочацца адзначыць літаратуру жанру нон-фікшн - серыю "Люстэрка лесу". Там ужо выйшла кніга Вячаслава Рагойшы "Дзесяць саг пра Караткевіча", - сказаў на заканчэнне Аляксандр Бадак.-0-
