17 снежня, Мінск /Кар. БЕЛТА/. На рэалізацыю праекта музейнага квартала ўжо выдзелена каля Br38 млн. Аб гэтым сёння журналістам расказаў міністр культуры Анатоль Маркевіч падчас адкрыцця выставачнага і рэстаўрацыйнага карпусоў музейнага квартала Нацыянальнага мастацкага музея ў Мінску, перадае карэспандэнт БЕЛТА.
"Сёння знамянальны дзень, паколькі мы сустракаемся ў сапраўднай скарбніцы нашага айчыннага мастацтва. Музей бесперапынна развіваецца. Сёння збор твораў беларускага і замежнага мастацтва складае каля 30 тыс. экзэмпляраў. Дзякуючы падтрымцы дзяржавы і асабіста Прэзідэнта рэалізуецца маштабны і значны праект - музейны квартал. Для яго рэалізацыі ўжо накіравана і асвоена каля Br38 млн", - сказаў Анатоль Маркевіч.
Міністр культуры таксама адзначыў высокі ўзровень матэрыяльна-тэхнічнай базы: "Створаны выдатныя ўмовы для супрацоўнікаў музея. Я ўпэўнены: усё гэта дасць магчымасць на яшчэ больш якасным узроўні праводзіць навуковую і выставачную работу. Безумоўна, для гэтага ўсё неабходнае ёсць. Праект маштабны, работы вяліся не без цяжкасцей, але тым не менш дзякуючы нашай сумеснай рабоце ўсё задуманае спраўдзілася".
"Наперадзе нас таксама чакаюць работы. Мы разам з дырэкцыяй музея абмяркоўваем іх чарговасць. Тут з'явіцца вельмі ўтульны дворык. Плануем звязаць усе карпусы галерэямі для таго, каб чалавек мог прыйсці ў музей і не выходзячы за яго межы наведаць усе выставачныя залы. Таму задумы і планы ёсць, і мы паступова будзем іх рэалізоўваць", - падкрэсліў Анатоль Маркевіч.
Паводле даных Міністэрства культуры, рэканструкцыя будынка рэстаўрацыйнага корпуса па вул. Кірава, 25 дала магчымасць выдзеліць дадатковыя памяшканні для навукова-даследчых і рэстаўрацыйных майстэрняў. Дзякуючы 14 новым памяшканням плошча майстэрняў павялічылася з 810 кв.м да 1398 кв.м. Рэстаўрацыйны цэнтр уключае чатыры майстэрні па рэстаўрацыі алейнага жывапісу, чатыры - сектары рэстаўрацыі старажытнабеларускага мастацтва, чатыры - сектары рэстаўрацыі дэкаратыўна-прыкладнога мастацтва. У тым ліку ёсць майстэрня па рэстаўрацыі прадметаў з тканіны, металу, дрэва, фарфору і керамікі. Для агульнага карыстання прызначаны майстэрня для пакрыцця лакам і майстэрня для рэстаўрацыі вялікафарматнага жывапісу.
Акрамя майстэрняў у рэстаўрацыйным корпусе размясціліся восем новых фондасховішчаў, аснашчаных спецыяльнымі сістэмамі захоўвання музейных прадметаў і калекцый. Цяпер калекцыі беларускага, рускага і савецкага жывапісу перамесцяць у больш камфортныя ўмовы.
Як адзначылі ў Міністэрстве культуры, з адкрыццём рэстаўрацыйнага корпуса музейная бібліятэка заняла новае памяшканне з асобным кнігасховішчам, аснашчаным мабільнымі сістэмамі захоўвання, чытальнай залай з камп'ютарызаванымі рабочымі месцамі. У двух памяшканнях агульнай плошчай 164 кв.м размешчаны 40 тыс. адзінак кніг і перыядычных выданняў.
Выставачны корпус размяшчаецца на вуліцы К. Маркса, 24. Складаецца ён з чатырох асобных залаў агульнай плошчай 846 кв.м. Дзякуючы пашырэнню плошчы павялічыцца колькасць выставачных праектаў.
Для захаванасці экспанатаў новыя музейныя карпусы аснашчаны сістэмамі кандыцыяніравання паветра, якія працуюць кругласутачна. Італьянскія прэцызійныя і цэнтральныя кандыцыянеры забяспечваюць неабходны мікраклімат у памяшканнях выставачнага і рэстаўрацыйнага карпусоў.
"Асаблівую ўвагу ўдзялілі арганізацыі даступнага асяроддзя ў музеі. Для наведвальнікаў, якія перамяшчаюцца ў крэсле-калясцы і зведваюць цяжкасці з пераадоленнем прыступак лесвічных пралётаў, уваход у выставачны корпус абсталяваны пандусам. Унутры будынка размешчаны пад'ёмнік для інвалідаў, два ліфты з гукавым суправаджэннем і спецыяльныя санвузлы для маламабільных грамадзян. Праз пешаходны атрыум на трэцім паверсе будынка наведвальнікі змогуць трапіць у выставачныя залы галоўнага корпуса", - дадалі ў Міністэрстве культуры.
Ідэя стварыць адзіны музейны комплекс будынкаў у межах аднаго квартала зарадзілася ў пачатку 2000-х гадоў. Мэта - найбольш поўна і рознабакова прадставіць нацыянальнае мастацтва ў кантэксце сусветнага, асабліва тую яго частку, якая захоўваецца ў запасніках і недаступна для наведвальнікаў.
Сучасная музейная інфраструктура разлічана на вялікую колькасць наведвальнікаў і ўключае экспазіцыйныя і выставачныя залы, дэпазітарый, рэстаўрацыйныя майстэрні, навуковую бібліятэку і архіў, адміністрацыйныя памяшканні, шматфункцыянальныя пляцоўкі для мерапрыемстваў, сувенірны магазін, кавярню, зоны адпачынку.-0-
