3 верасня, Брэст /Кар. БЕЛТА/. Маларыцкія майстрыхі выткалі 16 ручнікоў і два традыцыйныя касцюмы да фестывалю працаўнікоў вёскі Брэсцкай вобласці "Дажынкі-2020", паведаміла карэспандэнту БЕЛТА дырэктар раённага цэнтра народнай творчасці Валянціна Струнец.
Карпатлівай работай разам з Валянцінай Струнец была занята майстар народных рамёстваў Святлана Луцык. За паўтара месяца жанчыны выткалі 16 ручнікоў (па колькасці раёнаў Брэсцкай вобласці), на якіх на "Дажынках" вынесуць караваі са збожжа новага ўраджаю.
Кожны ручнік атрымаўся даўжынёй амаль 2,5 м. Вытканы яны ў тэхніцы "наборам". Вырабы ўпрыгожваюць ўзоры і арнаменты маларыцкага строю ў характэрным для яго бардовым колеры. "На кожным ручніку васьміканцовая зорка як сімвал душы чалавека і абавязкова крыж - ахоўная сіла", - растлумачыла Валянціна Струнец. Стварылі майстрыхі і два традыцыйныя маларыцкія касцюмы для вядучых фестывалю. Яны вытканы ў тэхніцы "кажушком".
"Гэта ўнікальная тэхналогія, якая была страчана ў XIX стагоддзі і адноўлена ў 2011 годзе. Мы падрыхтавалі дакументы на ўнясенне тэхналогіі ткацтва "кажушком" у спіс нематэрыяльнай культурнай спадчыны Беларусі. У гэтым годзе камісія павінна разгледзець нашу прапанову", - сказала дырэктар цэнтра народнай творчасці.
Вопыт ткацтва майстра маюць намер не толькі захоўваць, але і дзяліцца ім са сваімі замежнымі партнёрамі. Па праекце трансгранічнага супрацоўніцтва плануецца праводзіць тэматычныя мерапрыемствы, майстар-класы. Напрыклад, беларусы могуць азнаёміць са старадаўняй тэхнікай ткацтва, польскі бок - з пучковым саломапляценнем.
Фестываль працаўнікоў вёскі Брэсцкай вобласці пройдзе 12 верасня ў аграгарадку Дзівін Кобрынскага раёна.-0-
