23 лютага, Мінск /Кар. БЕЛТА/. Прэзідэнт Беларусі Аляксандр Лукашэнка назваў Дзень абаронцаў Айчыны і Узброеных Сіл святам тых, хто з'яўляецца апорай міру і стабільнасці. Аб гэтым ён заявіў на ўрачыстай цырымоніі ўручэння дзяржаўных узнагарод і генеральскіх пагонаў афіцэрам сілавога блока краіны, перадае карэспандэнт БЕЛТА.
Мерапрыемства арганізавана ў Палацы Незалежнасці і прымеркавана да аднаго з галоўных свят краіны - Дня абаронцаў Айчыны і Узброеных Сіл.
"Гэта свята тых, для каго абавязак, гонар і Радзіма - важнейшыя жыццёвыя арыенціры. Тых, хто носіць пагоны і з'яўляецца апорай міру і стабільнасці ў краіне, карыстаючыся заслужанай павагай усяго беларускага народа", - падкрэсліў кіраўнік дзяржавы.
"Нядаўна, сустракаючыся з вучонымі, я сказаў, што без навукі ў нас няма будучыні. Дадам, што без людзей у пагонах, якія стаяць на варце правапарадку і закону, у нас наогул не будзе нічога, у тым ліку і краіны", - заявіў Аляксандр Лукашэнка.
Прэзідэнт выказаў упэўненасць, што заслужаныя ўзнагароды і новыя пагоны стануць для іх уладальнікаў добрым стымулам для далейшай работы. "Таксама перакананы, што, калі спатрэбіцца, кожны з вас без ваганняў зробіць усё магчымае і немагчымае для абароны Беларусі - надзейна і з годнасцю, як павінен гэта зрабіць сапраўдны афіцэр", - сказаў Аляксандр Лукашэнка.
Кіраўнік дзяржавы яшчэ раз павіншаваў усіх са святам, а прысутных яшчэ і з заслужанымі ўзнагародамі і званнямі, пажадаўшы моцнага здароўя, дабра, шчасця і міру роднай Беларусі.-0-
Падпісвайцеся на нас у
