17 верасня, Магілёў /Кар. БЕЛТА/. IV Купалаўскія чытанні пройдуць сёння ў бібліятэцы-філіяле нумар 9 імя Я.Купалы ў Магілёве. Аб гэтым БЕЛТА паведаміла загадчыца аддзела бібліятэчнага маркетынгу Цэнтральнай гарадской бібліятэкі імя К.Маркса Алена Шэпелева.
"Праводзіць такія чытанні ў бібліятэцы-філіяле нумар 9 імя Я.Купалы ўжо стала добрай традыцыяй. У гэтым годзе мерапрыемства прысвечана Дню і Году народнага адзінства. Акрамя таго, бібліятэка-філіял святкуе пяцігоддзе з дня прысваення ёй імя народнага паэта Беларусі", - адзначыла Алена Шэпелева.
Для ўдзельнікаў мерапрыемства падрыхтавалі прафесійна-творчую лабараторыю, літаратурна-паэтычную гасцёўню, прэзентацыю кніжных навінак і шмат іншага. "Ва ўсіх прысутных будзе ўнікальная магчымасць сустрэцца з вядомымі беларускімі паэтамі, набыць кнігі па цане выдавецтва і атрымаць аўтограф аўтара", - падкрэсліла загадчыца аддзела.
Таксама пройдзе круглы стол, удзельнікамі якога стануць супрацоўнікі бібліятэк, выкладчыкі беларускай мовы і літаратуры, дэпутаты Палаты прадстаўнікоў, літаратурныя дзеячы, паэты і пісьменнікі. Яшчэ адным важным момантам мерапрыемства стануць анлайн-размовы са спецыялістамі гімназіі імя Я.Купалы ў Мазыры і Цэнтралізаванай сістэмы дзяржаўных публічных бібліятэк Мінска.
Пачатак чытанняў у 11.00. Уваход свабодны.-0-
