8 лістапада, Магілёў /Кар. БЕЛТА/. Фестываль "Палітра творчасці" пройдзе 24-26 лістапада ў Магілёве. У гэтым годзе конкурс будзе прысвечаны 60-годдзю Беларуска-Расійскага ўніверсітэта, расказалі карэспандэнту БЕЛТА ў адміністрацыі ўстановы адукацыі.
"Асаблівасць фестывалю ў тым, што яго ўдзельнікамі становяцца канкурсанты, не звязаныя з атрыманнем адпаведнай творчай спецыяльнасці, - эканамісты, праграмісты, інжынеры, бухгалтары і многія іншыя, - адзначылі ва ўніверсітэце. - Мерапрыемства праходзіць з 2011 года і знаходзіць у студэнцкім асяроддзі пазітыўны водгук. Больш таго, з кожным годам расце ўзровень творчага і выканальніцкага майстэрства ўдзельнікаў, якія заўсёды знаходзяць, чым здзівіць журы".
Фестываль аб'ядноўвае ў сабе 4 самастойныя творчыя напрамкі: штогадовы адкрыты конкурс папулярнай песні "Студэнцкі лістапад", конкурс сучаснага і эстраднага танца "Танцы 100%", конкурс "Тэатр +" і фотаконкурс. Пераможцы песеннага конкурсу вызначаюцца па дзвюх намінацыях - саліст і вакальны ансамбль. У танцавальным спаборніцтве лепшых з лепшых вызначаць па трох напрамках танца: эстрадны, сучасны (джаз-мадэрн, вог, данс-хол, брэйк-данс, хіп-хоп і інш.), а таксама тэатр танца - выступленне з элементамі шоу.
У конкурсе тэатральнага майстэрства ўдзельнікам прапануюць прэзентаваць творчыя нумары, якія адлюстроўваюць культурна-гістарычную спадчыну народаў Расіі і Беларусі. У фотаконкурсе студэнты могуць заявіцца ў дзвюх намінацыях: "Універсітэт. Студэнцтва. Традыцыі" і "Мая краіна - мая апора". "У першай павінны быць прадстаўлены работы, якія перадаюць студэнцкія традыцыі, аб'ядноўваюць пакаленні, а таксама творчыя праекты ўніверсітэта і культурна-забаўляльныя мерапрыемствы, прысвечаныя народнаму адзінству, - растлумачылі ў навучальнай установе. - У другой - здымкі, якія паказваюць развіццё краіны або вобраз чалавека-стваральніка, які працуе на карысць роднай зямлі".
Лепшых узнагародзяць прызамі і дыпломамі адпаведных ступеней. Цырымонія ўзнагароджвання адбудзецца 26 лістапада на заключным гала-канцэрце. Як адзначылі ў ВНУ, мерапрыемства накіравана на кансалідацыю творчай моладзі Расіі і Беларусі, выяўленне і падтрымку таленавітых студэнтаў, захаванне і папулярызацыю культурнай спадчыны братэрскіх народаў.-0-
