10 жніўня, Мінск /Кар. БЕЛТА/. "Беларусь 3" пакажа тэматычныя кінафільмы і дакументальныя праекты ўласнай вытворчасці, прымеркаваныя да дзён нараджэння Алега Табакова, Алеся Ксёндзава, Івана Паўлава і Пімена Панчанкі. Аб гэтым БЕЛТА паведамілі ў прэс-службе Белтэлерадыёкампаніі.
Народнаму артысту СССР Алегу Табакову 17 жніўня магло б споўніцца 85 гадоў. Сацыякультурны тэлеканал прапануе гледачам у гэты дзень у 16.00 і 23.40 паглядзець меладраму "Калі можаш, даруй..." з удзелам знакамітага акцёра.
Да дня нараджэння беларускага мастака Алеся Ксёндзава 18 жніўня ў 17.10 будзе прадстаўлены выпуск праграмы "Майстэрня. Гісторыя аднаго мастака".
Беларускі акцёр, рэжысёр і сцэнарыст Іван Паўлаў нарадзіўся 20 жніўня. У гэты дзень гледачам прапануюць адну з яго прац як пастаноўшчыка - камедыю "На спіне ў чорнага ката" ў 13.50 і 21.05.
Да дня нараджэння перакладчыка, крытыка, народнага паэта БССР Пімена Панчанкі 23 жніўня ў 16.10 у эфіры пакажуць дакументальна-біяграфічны праект "Запіскі на палях" серыі "Пімен Панчанка: сінія касачы для паэта-філосафа".-0-