11 верасня, Мінск /Кар. БЕЛТА/. У Расіі падводзяць вынікі праведзенага 10 верасня Адзінага дня галасавання, інфармуе ТАСС.
Выбары розных узроўняў прайшлі ў 82 з 85 рэгіёнаў Расіі. Выключэнні склалі Санкт-Пецярбург, Інгушэція і Магаданская вобласць. У Кінгісепскім і Бранскім аднамандатных акругах прайшлі дадатковыя выбары ў Дзярждуму. Прамыя выбары кіраўнікоў суб'ектаў прайшлі ў 16 рэгіёнах. Кіраўніка Адыгеі выбралі дэпутаты рэгіянальнага парламента - ім стаў часова выконваючы абавязкі кіраўніка рэспублікі Мурат Кумпілаў, які ў той жа дзень прыняў прысягу. У шасці суб'ектах РФ - у Паўночнай Асеціі, Удмурціі, Краснадарскім краі, Пензенскай, Саратаўскай і Сахалінскай абласцях - прайшлі выбары заканадаўчых сходаў. Таксама прайшлі мноства муніцыпальных выбараў.
Увогуле ў ходзе 5,8 тыс. выбарчых кампаній рэгіянальнага і муніцыпальнага ўзроўняў замяшчалася каля 36,7 тыс. мандатаў. Усяго ў выбарах удзельнічалі 42 партыі і шэсць грамадскіх аб'яднанняў. Праведзеная выбарчая кампанія стала апошняй буйной кампаніяй перад выбарамі прэзідэнта РФ. Яны павінны быць назначаны ўжо ў снежні, а прайсці ў сакавіку 2018 года.
Большасць выбарчых камісій яшчэ толькі падводзяць вынікі нядзельнага галасавання, хоць ва ўсходніх рэгіёнах краіны вынікі нядзельных выбараў ужо зразумелыя. Пераканаўчую перамогу атрымлівае выконваючы абавязкі кіраўніка Бураціі Аляксей Цыдзенаў: па выніках апрацоўкі 52,5 працэнта ён набірае 87,29 працэнта галасоў. Кіраўнік Томскай вобласці Сяргей Жвачкін, які перавыбіраецца на гэту пасаду, набірае амаль 59 працэнтаў галасоў пасля аналізу 68 працэнтаў пратаколаў, а выконваючы абавязкі губернатара Свярдлоўскай вобласці Яўген Куйвашаў пасля апрацоўкі 51,57 працэнта пратаколаў атрымлівае, паводле даных аблвыбаркама, 60,84 працэнта.
Адзіны дзень галасавання, у ходзе якога выбарамі рознага ўзроўню былі ахоплены амаль усе расійскія рэгіёны, прадэманстраваў у цэлым стандартную яўку выбаршчыкаў і не прынёс якіх-небудзь прыкметных сенсацый у плане вынікаў.
"Мы можам сведчыць, што выбары - а іх было шмат у гэты адзіны дзень галасавання - у нашай краіне адбыліся і прайшлі на высокім узроўні", - заявіў на селектарнай нарадзе з выбарчымі штабамі рэгіянальных аддзяленняў "Адзінай Расіі" старшыня партыі, прэм'ер-міністр РФ Дзмітрый Мядзведзеў. "У гэты раз выбары не былі сумешчаны з федэральнай кампаніяй, але ў цэлым гэта не паўплывала на іх якасць, і практычна ў кожным рэгіёне нашы выбаршчыкі дэманстравалі павагу да выбараў і даволі высокую актыўнасць - недзе больш, недзе менш, але ўсюды выбары прайшлі на добрым узроўні", - падкрэсліў ён.
ЦВК РФ у ходзе адзінага дня галасавання не было выяўлена якіх-небудзь істотных парушэнняў, якія маглі б паўплываць на ацэнку вынікаў галасавання.-0-
