27 верасня, Мінск /Кар. БЕЛТА/. Дзень нацыянальнай жалобы пройдзе ў Францыі 30 верасня ў сувязі са смерцю экс-кіраўніка краіны Жака Шырака. Аб гэтым заявіў прэзідэнт Францыі Эмануэль Макрон, паведамляе французская газета Le Figaro.
"Мы, французы, страцілі дзяржаўнага дзеяча, якога мы любілі гэтак жа моцна, як ён любіў нас", - сказаў Эмануэль Макрон у тэлезвароце да суграмадзян.
Апоўдні 30 верасня ў царкве Сен-Сюльпіс у Парыжы адбудзецца богаслужэнне, прысвечанае развітанню з Жакам Шыракам. Дата і месца пахавання экс-прэзідэнта пакуль не паведамляліся.
Дні нацыянальнай жалобы праходзілі ўжо ў Францыі пасля смерці Шарля дэ Голя ў 1970 годзе, Жоржа Пампіду ў 1974 годзе і Франсуа Мітэрана ў 1996 годзе.
Як паведамлялася раней, былы прэзідэнт Францыі Жак Шырак памёр 26 верасня ва ўзросце 86 гадоў. Ён узначальваў краіну з 1995 па 2007 год, да выбрання на вышэйшую пасаду двойчы займаў крэсла прэм'ер-міністра Францыі і тройчы быў мэрам Парыжа. У 2005 годзе Жак Шырак перажыў інсульт, пакутаваў ад хваробы аназагназіі.-0-
