4 лістапада, Мінск /Кар. БЕЛТА/. Уладам Бельгіі накіраваны ордэр на арышт экс-кіраўніка Каталоніі Карлеса Пучдэмона і яго чацвёра саратнікаў. Як паведамляюць інфармагенцтвы, дакумент на затрыманне названых асоб, якія знаходзяцца ў Бельгіі і раней на бягучым тыдні не з'явіліся ў іспанскі суд, накіравала суддзя Нацыянальнай судовай калегіі Іспаніі Кармэн Ламела.
У ордэры адзначана, што ў Іспаніі Карлес Пучдэмон і яго саратнікі абвінавачваюцца ў бунце, непадпарадкаванні ўладам і растраце грамадскіх сродкаў.
Адзначаецца, што ордэр на арышт дазволіць вярнуць экс-кіраўніка ўрада Каталоніі ў Іспанію на працягу 60 дзён з любой краіны ЕС.
У сваю чаргу сам Пучдэмон заявіў, што гатовы паўстаць толькі перад "сапраўдным правасуддзем". "Я не збіраюся скрывацца ад правасуддзя, але ад сапраўднага правасуддзя", - сказаў ён напярэдадні ў эфіры тэлерадыёкампаніі RTBF. Знаходжанне на тэрыторыі Бельгіі растлумачыў тым, што пакінуў Іспанію, каб лепш падрыхтаваць сваю абарону ў судзе.
Ён таксама заявіў аб гатоўнасці вылучыць сваю кандыдатуру на каталонскіх выбарах 21 снежня, няхай нават гэта давядзецца рабіць з-за мяжы.-0-
