20 ліпеня, Мінск /Кар. БЕЛТА/. Выканаўчы камітэт Міжнароднага алімпійскага камітэта зацвердзіў расклад ХХХII летняй Алімпіяды, якая пройдзе ў 2020 годзе ў Токіа, паведамілі карэспандэнту БЕЛТА ў прэс-службе НАК Беларусі.
Першымі на алімпійскія арэны японскай сталіцы выйдуць прадстаўнікі футбола і софтбола, якія свае матчы пачнуць 22 ліпеня за два дні да цырымоніі адкрыцця Гульняў. Спаборніцтвы па акадэмічным веславанні і стральбе з лука пройдуць 24 ліпеня, у дзень адкрыцця Алімпіяды. На наступны дзень спартсмены паспаборнічаюць за ўзнагароды ў 21 відзе спорту, уключаючы, у прыватнасці, кулявую стральбу, настольны тэніс, дзюдо, бадмінтон, гімнастыку, тэніс і веласпорт.
У першы спаборніцкі тыдзень пройдуць старты ў дэбютантаў АГ - баскетбола 3х3, скейтбордынга і сёрфінга.
Мужчынскі марафон па традыцыі пройдзе ў дзень закрыцця Алімпійскіх гульняў - 9 жніўня.
Чакаецца, што ў спаборніцтвах такійскай Алімпіяды прымуць удзел каля 12,5 тыс. спартсменаў больш чым з 200 дзяржаў планеты.-0-