31 жніўня, Мінск /Кар. БЕЛТА/. Баскетбольны клуб "Цмокі-Мінск" у ходзе падрыхтоўкі да новага сезона прадаўжае ўмацоўваць склад, паведамілі БЕЛТА ў прэс-службе сталічнай каманды.
Сёння гадавы кантракт з мінскімі "цмокамі" падпісаў разыгрываючы з Босніі і Герцагавіны Філіп Адамовіч. Сваю прафесійную кар'еру ён пачаў у 2006 годзе на радзіме, потым гуляў у клубах Сербіі, а з 2013-га выступаў у румынскіх камандах, апошнім з якіх быў "Клуж". За мінулыя гады Адамовіч станавіўся чэмпіёнам сваёй роднай краіны і Румыніі, а цяпер перабраўся пад сцягі 9-разовых трыумфатараў першынства Беларусі.
Напярэдадні гадавое пагадненне з "Цмокамі" падпісаў форвард зборнай Беларусі Віктар Аўсепян, які апошні сезон правёў у віцебскім клубе "Рубон".
Сёння каманда Аляксандра Круцікава адправілася на міжнародны турнір у Польшчу. У стартавым матчы спаборніцтваў 1 верасня мінчане сустрэнуцца з гаспадарамі, 2 верасня згуляюць з яшчэ адным польскім клубам "Люблінам", а 3 верасня завершаць турнір гульнёй з чэшскім "Пардубіцэ".-0-