26 чэрвеня, Мінск /Кар. БЕЛТА/. Мужчынская каманда ХК "Мінск" абараніла тытул чэмпіёна Беларусі па хакеі на траве, абыграўшы ў трэцім матчы фінальнай серыі брэсцкі "Будаўнік" з лікам 2:1, паведамляе карэспандэнт БЕЛТА.
Вырашальны гол на 57-й хвіліне гульні, праведзенай на штучным полі ў Мінску, забіў нападаючы гаспадароў Іван Луцэвіч. У дзвюх папярэдніх сустрэчах хакеісты "Мінска" былі мацнейшымі, чым "Будаўнік" - 4:0 і 3:2. Для сталічнай дружыны пад кіраўніцтвам Сяргея Драздова гэта чацвёрты чэмпіёнскі тытул запар. Бронзавым прызёрам чэмпіянату сталі хакеісты "Гомеля".
У жаночым турніры барацьба за залатыя ўзнагароды прадаўжаецца. Пасля перамогі на сваім полі (1:0) гродзенскі "Рытм" пацярпеў паражэнне на выездзе ад смалявіцкай "Вікторыі" - 0:3. Хет-трыкам у каманды мінскага рэгіёна вызначылася Юлія Міхейчык. Лік у серыі да дзвюх перамог стаў 1:1, і трэці матч пройдзе 28 чэрвеня ў Смалявічах. Бронзавыя ўзнагароды чэмпіянату заваявалі хакеісткі "Мінска", якія абыгралі ў вырашальным матчы баранавіцкі "Тэкстыльшчык" - 2:1.
Пасля завяршэння сезона на ўнутранай арэне і нацыянальныя маладзёжныя зборныя Беларусі, складзеныя з ігракоў вядучых клубаў нацыянальнага чэмпіянату, пачнуць падрыхтоўку да чэмпіянатаў Еўропы. Спаборніцтвы адбудуцца ў ліпені-жніўні бягучага года.-0-
