2 сакавіка, Мінск /Кар. БЕЛТА/. Беларускі скакун у вышыню Максім Недасекаў заняў шостае месца на чэмпіянаце свету па лёгкай атлетыцы ў закрытых памяшканнях у англійскім Бірмінгеме, паведамляе карэспандэнт БЕЛТА.
Ён упэўнена справіўся з пачатковай вышынёй 220 см. Аднак не змог пераадолець планку на адзнацы 225 см. Чэмпіёнам свету стаў расійскі спартсмен Даніл Лысенка, які паказаў рэзультат 236 см. Ён апярэдзіў прадстаўніка Катара Мутаза Эса Баршыма (233 см) і Матэвуша Пжыбілка з Германіі (229 см).
"Расстроіўся з-за выніку, паколькі яшчэ за суткі да старту ў Бірмінгеме знаходзіўся ў цудоўнай форме. Будзем разбірацца з трэнерам. Па тых рэзультатах, якія былі паказаны ў сектары для скачкоў сапернікамі, цалкам мог разлічваць на медаль", - адзначыў Максім Недасекаў.
Беларус у 2017 годзе стаў чэмпіёнам Еўропы сярод юніёраў у Італіі з рэзультатам 233 см. Іншы айчынны скакун у вышыню Павел Селіверстаў не змог адправіцца ў Бірмінгем, захварэўшы напярэдадні ад'езду.
У спаборніцтвах сярод жанчын у скачках у вышыню не было роўных расіянцы Марыі Ласіцкене, якая ў сваёй лепшай спробе пераадолела планку на вышыні 201 см. Серабро заваявала амерыканка Вашці Канінгем, а бронзавым прызёрам стала італьянка Алесія Трост. Для Ласіцкене перамога на сусветным форуме ў закрытых памяшканнях стала 38-й запар на міжнародных стартах.
Зімовы чэмпіянат свету па лёгкай атлетыцы прадоўжыцца 2 сакавіка. У 13.35 па беларускім часе адбудуцца папярэднія забегі на дыстанцыі 60 м у жанчын, дзе выступіць беларуска Хрысціна Ціманоўская. У вячэрняй сесіі ў барацьбу ўключацца Аліна Талай і Эльвіра Герман, якім давядзецца пераадолець кваліфікацыю, таксама адбудзецца фінал у штурханні ядра ў жанчын, дзе Беларусь прадставяць Алёна Дубіцкая і Юлія Леанцюк. Завершыцца сусветны форум 4 сакавіка.-0-
