18 мая, Мінск /Кар. БЕЛТА/. Вадзіцелі змогуць праверыць колькасць набраных штрафных балаў у спецыяльным дадатку. Аб гэтым сёння ў прэс-цэнтры БЕЛТА паведаміў начальнік аддзела забеспячэння правапрымяняльнай дзейнасці УДАІ МГБ МУС Аляксандр Занімон у час круглага стала, прысвечанага абмеркаванню законапраекта "Аб змяненні Закона Рэспублікі Беларусь "Аб дарожным руху".
На гэты момант у законапраекце ёсць норма, што інфармацыя аб колькасці набраных штрафных балаў будзе захоўвацца ў спецыяльным дадатку. "Плануецца рэалізаваць гэта на сайце МУС. Любы чалавек зможа паглядзець інфармацыю аб сабе", - адзначыў Аляксандр Занімон.
Прадстаўнік МУС падкрэсліў, што распрацоўшчыкі праекта закона пастараліся зрабіць сістэму налічэння балаў празрыстай. У дакуменце прапісана, якому парушэнню адпавядае тая ці іншая іх колькасць. Кожны вадзіцель можа паглядзець, якія ў яго былі парушэнні, і палічыць балы, якія яму налічаны, супаставіўшы гэту інфармацыю з тэрмінам іх дзеяння.-0-