30 мая, Мінск /Кар. БЕЛТА/. Восьмы міжнародны форум "Атамэкспа" адкрываецца сёння ў Маскве, паведамляе БЕЛТА.
Форум "Атамэкспа" будзе прысвечаны абмеркаванню найбольш актуальных пытанняў развіцця атамнай энергетыкі. У час форуму адбудуцца міжнародная спецыялізаваная выстаўка і кангрэс з удзелам прадстаўнікоў міжнародных, дзяржаўных і грамадскіх арганізацый, прадстаўнікоў расійскіх і замежных кампаній, вядучых экспертаў у сферы атамнай прамысловасці.
Плануецца, што ў мерапрыемствах форуму прымуць удзел намеснік міністра энергетыкі Беларусі Міхаіл Міхадзюк і генеральны дырэктар ДП "Беларуская АЭС" Міхаіл Філімонаў. На экспазіцыйным стэндзе Беларускай АЭС будуць дэманстравацца відэа- і фотаматэрыялы аб гісторыі развіцця праекта будаўніцтва Беларускай атамнай электрастанцыі, а таксама прадстаўлена інфармацыя аб выніках будаўнічых работ, выкананых у 2015 годзе, і задачах на бягучы год.
Адной з ключавых падзей форуму стане пленарная сесія "Будучае атамнай энергетыкі. Новыя ігракі", якая прысвечана агульным пытанням развіцця сусветнай атамнай энергетыкі, а таксама пытанням супрацоўніцтва з краінамі, што плануюць развіваць атамную энергетыку, і асноўным аспектам комплекснай прапановы "Расатама". Новыя ігракі - гэта краіны-навічкі, якія пакуль не маюць вопыту выкарыстання ядзерных тэхналогій, уступленне ў рады "атамных краін" можа стаць каталізатарам для іх высокатэхналагічнага развіцця і абавязкова паўплывае на будучае атамнай генерацыі. Мадэратарам гэтай сесіі выступіць генеральны дырэктар Сусветнай ядзернай асацыяцыі Агнета Рызінг.
Плануецца, што на пленарнай сесіі з прывітальным словам да ўдзельнікаў "Атамэкспа" звернецца генеральны дырэктар дзяржкарпарацыі "Расатам" Сяргей Кірыенка. У дыскусіі прымуць удзел першы намеснік генеральнага дырэктара - дырэктар блока па развіцці і міжнародным бізнесе дзяржкарпарацыі "Расатам" Кірыл Камароў, намеснік генеральнага дырэктара МАГАТЭ Міхаіл Чудакоў, прадстаўнікі міністэрстваў энергетычнага профілю Балівіі, Нігерыі, Іарданіі, Камбоджы і іншыя.
Акрамя таго, у дзелавым парадку дня форуму "Атамэкспа" значыцца работа больш як 10 дыскусійных пляцовак.
Форум будзе прадаўжацца па 1 чэрвеня. Арганізатар мерапрыемства - дзяржкарпарацыя "Расатам", аператар - ТАА "Атамэкспа". У 2015 годзе ў дзелавой праграме форуму прынялі ўдзел звыш 4,1 тыс. прадстаўнікоў з 47 краін. Мерапрыемства асвятлялі каля 450 журналістаў расійскіх і замежных СМІ.-0-
