19 верасня, Мінск /Алена Прус - БЕЛТА/. Субсідыі на арганізацыю ўласнага бізнесу ў студзені-жніўні бягучага года атрымалі 1 117 беспрацоўных (62,3 працэнта гадавога задання), паведамілі карэспандэнту БЕЛТА ва ўпраўленні палітыкі занятасці Міністэрства працы і сацыяльнай абароны.
Падтрымка дзелавой ініцыятывы з'яўляецца адным з важных напрамкаў палітыкі ў галіне садзейнічання занятасці насельніцтва. Сярод асноўных відаў прадпрымальніцкай дзейнасці, якія арганізуюць беспрацоўныя, - аказанне разнастайных паслуг (транспартныя, цырульніцкія, правядзенне будаўніча-аддзелачных работ, пашыў і рамонт адзення, тэхнічнае абслугоўванне і рамонт аўтамабіляў), а таксама гандлёвая дзейнасць, вытворчасць сельгаспрадукцыі.
Прычым акрамя грашовай падтрымкі будучым бізнесменам аказваюць кансультатыўную, метадычную і прававую дапамогу, вучаць прававым і фінансавым асновам прадпрымальніцкай дзейнасці. Кожны трэці, хто атрымаў фінансавую падтрымку ад дзяржслужбы занятасці, пражывае ў малых гарадах і сельскіх населеных пунктах.
Субсідыя прадастаўляецца беспрацоўнаму ў памеры 11-кратнай велічыні бюджэту пражытачнага мінімуму ў сярэднім на душу насельніцтва (БПМ). Пры арганізацыі беспрацоўнымі прадпрымальніцкай дзейнасці ў малых гарадах і населеных пунктах з устойліва высокім узроўнем беспрацоўя, а таксама ў сельскіх населеных пунктах субсідыя прадастаўляецца ў памеры 15 БПМ. Пры арганізацыі беспрацоўнымі прадпрымальніцкай дзейнасці, звязанай з укараненнем вынікаў навуковых даследаванняў і распрацовак, памер субсідыі дасягае 20-кратнай велічыні БПМ.
Падпраграмай "Садзейнічанне занятасці насельніцтва" Дзяржаўнай праграмы аб сацыяльнай абароне і садзейнічанні занятасці насельніцтва на 2016-2020 гады прадугледжваецца ў бягучым пяцігоддзі аказаць садзейнічанне ў арганізацыі прадпрымальніцкай дзейнасці як мінімум 9,2 тыс. беспрацоўных, у тым ліку ў гэтым годзе - 1 792. У 2011-2015 гадах скарысталіся дзяржпадтрымкай для арганізацыі самазанятасці амаль 12 тыс. беспрацоўных.-0-