17 лістапада, Мінск /Кар. БЕЛТА/. Амнісціраваных экс-чыноўнікаў у Беларусі адправілі працаваць у стратныя калгасы. Аб гэтым Прэзідэнт Аляксандр Лукашэнка расказаў сёння ў час сустрэчы з прадстаўнікамі расійскіх рэгіянальных сродкаў масавай інфармацыі, перадае карэспандэнт БЕЛТА.
"Я заўсёды гавару: не чапай чужое - і будзеш спаць спакойна. У нас пакаранне няслабае карупцыянерам. Гэта таксама вельмі важна, яны павінны ведаць, што будуць сядзець, і нямала", - падкрэсліў кіраўнік дзяржавы.
Між тым Аляксандр Лукашэнка звярнуў увагу, што Прэзідэнт мае права правесці амністыю і выпусціць чыноўнікаў, якія праштрафіліся, на волю, тым самым даўшы ім шанц на выпраўленне. Так, паводле яго слоў, нядаўна ў Беларусі быў праведзены эксперымент, па выніках якога амнісціравалі групу чыноўнікаў і накіравалі іх працаваць у стратныя калгасы-саўгасы. "А чаго карміць іх у турме? Ідзіце, паказвайце сябе", - сказаў беларускі лідар.
"Сёння працуюць. Нават намеснік генеральнага пракурора (былы), - канстатаваў Прэзідэнт. - Гэта адзін з такіх, пайшоў старшынёй калгаса, працуе. У канцы года мне даложаць па ўсім спісе, як яны спрацавалі".
"Трэба быць акуратнымі, сумленнымі і справядлівымі, - сказаў Аляксандр Лукашэнка. - Не заплаціў падаткі, пакрыўдзіў чалавека - ідзі адказвай".
У цэлым, разважаючы на тэму карупцыі, кіраўнік дзяржавы выказаў меркаванне, што гэту негатыўную з'яву наўрад ці можна выкараніць поўнасцю, аднак неабходна трымаць яе на прымальным узроўні. "Такое ў нас жыццё цяпер, мы павінны гэта кантраляваць, і ўсе грамадзяне той ці іншай краіны павінны разумець, што ёсць парадак. Хоць не без недахопаў, хапае іх і ў нас", - лічыць ён.
На думку Аляксандра Лукашэнкі, "калі ўлада з галавы пачала падгніваць і там нядобрыя працэсы, ты нічога ў краіне не зробіш, каб не было карупцыі". "Я не хачу сказаць, што ў нас улада белая і пушыстая. Але няма ў нас сярод чыноўнікаў, каб дзесьці, ведаеце, казырнуць - палац, - адзначыў беларускі лідар. - Гэтыя дзеткі ў вас у Маскве на "Гелендвагене"... У нас адзін раз праехаў бы вось такім чынам, і больш тысячам не захацелася б ездзіць. А вы з імі там важдаецеся - то туды, то сюды, ён (ці яна) зноў садзіцца ў гэты аўтамабіль і стварае праблемы, а яшчэ задушыць дзясятак чалавек. Адкупіцца, пасадзяць, заўтра выпусцяць і гэтак далей. А павінна быць сумленна і справядліва. Ёсць парадак у краіне, і яго трэба прытрымлівацца, і закон павінен быць для ўсіх аднолькавы".
"У нас на кіраўнікоў праваахоўных органаў, пракурораў часта наскокі, што бізнесу не даюць развівацца - таго схапілі, гэтага схапілі. Па-першае, ніхто нікога не хапае. Я па сваёй першай адукацыі гісторык і ўмею рабіць высновы з гісторыі нашай краіны, - сказаў Аляксандр Лукашэнка. - Але ёсць правілы. Хапаюць і саджаюць толькі тых, хто гуляе недастойна ў гульні з дзяржавай, не плаціць падаткі. Падаткі - гэта святое. У Амерыцы самае жорсткае пакаранне за гэта - да 15 гадоў турмы, калі ты не плаціш нейкі дробны падатак. А ў нас гэта норма. Чаму так павінна быць?"
"Мы ўжо што толькі ні робім вакол гэтых бізнесменаў, на руках іх носім - ну дык вы ж плаціце падаткі за гэта", - дадаў Прэзідэнт.-0-
