28 кастрычніка, Мінск /Кар. БЕЛТА/. Старшыня ўрада Расіі Дзмітрый Мядзведзеў заклікае зняць бар'еры і абмежаванні ўнутры ЕАЭС. Аб гэтым ён заявіў 27 кастрычніка на пасяджэнні Еўразійскага міжурадавага савета ў пашыраным складзе, перадае карэспандэнт БЕЛТА.
"Адзіная прастора без выключэнняў, бар'ераў і абмежаванняў - гэта сапраўды важнейшы складнік устойлівага росту. Нягледзячы на тое што мы глядзім вонкі, спрабуем дамаўляцца з нашымі партнёрамі ў рамках зон свабоднага гандлю, яшчэ больш важным з'яўляецца ўстараненне ўнутраных бар'ераў", - заявіў Дзмітрый Мядзведзеў.
Адным з пытанняў для разгляду ў вузкім складзе быў праект Мытнага кодэкса ЕАЭС. "Сустрэча была карыснай, таму што гэта дае магчымасць зняць пытанні, якія на іншым узроўні вырашыць было немагчыма. Практычна палавіну з іх знялі. Мы дамовіліся прадоўжыць абмеркаванне", - дадаў старшыня расійскага ўрада.
Паводле яго слоў, у новым кодэксе закладзены перадумовы для пераходу да адзінага мытнага рэгулявання. "Расія выступае за тое, каб гэта быў поўнафарматны, паўнацэнны дакумент прамога дзеяння, не падзелены на часткі і не сегментаваны на нейкія адрэзкі, а які менавіта вызначае тое, якім чынам будзе існаваць Мытны кодэкс і развівацца Еўразійскі эканамічны саюз", - падкрэсліў Дзмітрый Мядзведзеў.
"Чым хутчэй мы рушым наперад у стварэнні адзінага мытнага дакумента, тым менш розных пратэкцыянісцкіх імкненняў будзе захоўвацца", - лічыць ён.-0-
