26 верасня, Мінск /Кар. БЕЛТА/. Міністр замежных спраў Беларусі Уладзімір Макей прыняў удзел у міністэрскай сустрэчы групы прыхільнікаў у падтрымку краін з сярэднім узроўнем даходу, паведамілі БЕЛТА ў прэс-службе МЗС.
"У штаб-кватэры ААН у Нью-Ёрку міністр замежных спраў Беларусі Уладзімір Макей прыняў удзел у міністэрскай сустрэчы дзяржаў, якія ўдзельнічаюць у групе прыхільнікаў у падтрымку краін з сярэднім узроўнем даходу. Сустрэча адбылася па ініцыятыве і пад старшынствам міністраў замежных спраў Беларусі і Коста-Рыкі", - растлумачылі ў прэс-службе.
У МЗС расказалі, што ўдзельнікі пасяджэння згадзіліся весці ў ААН актыўную сумесную работу, накіраваную на сістэмнае пашырэнне інтарэсаў краін з сярэднім узроўнем даходу ў галіне ўстойлівага развіцця. Міністры намецілі канкрэтныя напрамкі такой дзейнасці ў рамках сістэмы ААН і шляхі павышэння ўвагі шырокай сусветнай грамадскасці да патрэб і перспектыў развіцця краін з сярэднім узроўнем. Па прапанове Беларусі па выніках сустрэчы была прынята падагульняючая міністэрская дэкларацыя, якая замацоўвае мэты, задачы і формы работы групы аднадумцаў.
У сваім выступленні Уладзімір Макей адзначыў важнасць і своечасовасць аб'яднання найбольш актыўных краін з сярэднім узроўнем даходу для адстойвання сваіх калектыўных інтарэсаў. Міністр замежных спраў Беларусі назваў гэты крок знакавай падзеяй, якая запусціла якасна новы працэс і прадэманстравала магчымасць краін да з'яднання на аснове агульных мэт і інтарэсаў.
Уладзімір Макей падкрэсліў, што Беларусь будзе і ў далейшым ініцыіраваць і падтрымліваць пачынанні, якія садзейнічаюць дыялогу і ўзаемаразуменню на найбольш актуальных напрамках работы ААН.
У сустрэчы прынялі ўдзел міністры замежных спраў і іншыя высокія прадстаўнікі Беларусі, Арменіі, В'етнама, Ганы, Гватэмалы, Гандураса, Дамініканскай Рэспублікі, Казахстана, Калумбіі, Коста-Рыкі, Мексікі, Панамы, Сальвадора, Тайланда, Філіпін, Чылі, Эквадора, Ямайкі. У якасці гасцей мерапрыемстваў на ім прысутнічалі і выступілі старшыня Генеральнай Асамблеі ААН Пітэр Томсан і старшыня Эканамічнага і Сацыяльнага Савета ААН (ЭКАСАС) Фрэдэрык Шава (Зімбабвэ).
Генеральны сакратар ААН Пан Гі Мун звярнуўся да ўдзельнікаў сустрэчы з відэапасланнем, у якім заявіў аб ключавой ролі краін з сярэднім узроўнем даходу ў дасягненні мэт устойлівага развіцця.
Да катэгорыі краін з сярэднім узроўнем даходу адносяцца больш як сто краін свету, у якіх пражывае большасць насельніцтва планеты. На іх долю прыпадае больш як трэць сусветнага ВУП, чвэрць сусветнага экспарту і імпарту. Пры гэтым амаль 70 працэнтаў беднага насельніцтва планеты пражывае менавіта ў гэтых краінах. Па прапанове Беларусі, Коста-Рыкі і шэрага іншых краін у штаб-кватэры ААН у 2016 годзе была сфарміравана група аднадумцаў для актыўнага адстойвання інтарэсаў гэтай катэгорыі дзяржаў.-0-
