Сацыяльнае партнёрства ў працоўных адносінах неабходна развіваць. Такое меркаванне выказаў карэспандэнту БЕЛТА намеснік старшыні Віцебскага аблвыканкама Уладзімір Белавус перад пленумам Савета Віцебскага абласнога аб'яднання прафсаюзаў, прысвечанага тэме рэалізацыі прынцыпаў сацыяльнага партнёрства, замацаваных у пагадненнях і калектыўных дагаворах.
У Віцебскай вобласці асновай сацыяльнага партнёрства з'яўляецца пагадненне паміж Віцебскім аблвыканкамам, Віцебскім абласным саюзам наймальнікаў і Віцебскім абласным аб'яднаннем прафсаюзаў. У рамках гэтага пагаднення за кошт кансалідаваных намаганняў усіх бакоў праз калектыўныя дагаворы рэалізуецца комплекс мер па забеспячэнні сацыяльна-працоўных, эканамічных і прававых гарантый работнікаў.
Уладзімір Белавус падкрэсліў важнасць супрацоўніцтва сацыяльных партнёраў, неабходнасць максімальнага развіцця гэтых адносін. "Усё настроена на тое, каб у гэтым пытанні былі зрухі і станоўчыя рашэнні. З боку ўлады прымаюцца ўсе меры па забеспячэнні занятасці насельніцтва і стабільнай работы вытворчасцей. У гэтым напрамку зроблена ўжо нямала і на дастойным узроўні", - адзначыў Уладзімір Белавус.
Як паведаміў у ходзе пленума старшыня Віцебскага абласнога аб'яднання прафсаюзаў Іван Вазміцель,у вобласці дзейнічае больш за 2,3 тыс. калектыўных дагавораў, за кошт якіх сацыяльнымі гарантыямі забяспечаны каля 340 тыс. чалавек. "Дзякуючы выкананню сацыяльна-партнёрскіх абавязацельстваў вобласць уяўляе сабой развіты прамыслова-аграрны рэгіён Беларусі, удаецца пазбегнуць сацыяльнай напружанасці на рынку працы, захаваць працоўныя калектывы", - падкрэсліў Іван Вазміцель.
У рамках праводзімай прафсаюзамі работы сума сацыяльных выплат работнікам па калектыўных дагаворах за 2017 год склала ў Віцебскай вобласці амаль Br270 млн і вырасла ў параўнанні з 2016-м на 28,7 працэнта, або ў разліку на аднаго работніка - Br551 (на Br133,4 больш, чым у 2016 годзе).
"Выпрацоўваючы задачы і прыярытэты на перспектыву, мы павінны эфектыўна размяркоўваць сацыяльную адказнасць і нагрузку паміж дзяржавай, наймальнікамі і прафсаюзамі", - дадаў Іван Вазміцель.