Дэкрэт нумар 7 аб развіцці прадпрымальніцтва забяспечвае баланс бяспекі прадукцыі і паслуг і свабоды бізнесу. Такое меркаванне выказаў карэспандэнту БЕЛТА старшыня Дзяржаўнага камітэта па стандартызацыі Віктар Назаранка.
Гаворачы аб палажэннях дэкрэта ў частцы выстаўляемых да прадукцыі і паслуг тэхнічных патрабаванняў і пацвярджэння адпаведнасці ім, Віктар Назаранка адзначыў: "Ставілася задача, з аднаго боку, палегчыць работу бізнесу, мінімізаваць абавязковыя патрабаванні, а з іншага - гарантаваць бяспеку прадукцыі і паслуг для спажыўцоў. У выніку можна гаварыць аб тым, што неабходны баланс дасягнуты".
Палажэнні дэкрэта сур'ёзна закранулі такую катэгорыю дакументаў, як тэхнічныя кодэксы існуючай практыкі (ТКП). Прадугледжваецца добраахвотны характар іх прымянення, абавязковы - толькі пры наяўнасці спасылкі на ТКП у заканадаўчым акце, тэхнічным рэгламенце Беларусі, іншых нарматыўных прававых актах Савета Міністраў, або калі суб'ект гаспадарання добраахвотна заявіў аб выкананні ТКП. Пры гэтым тэхнічныя нарматыўныя прававыя акты, у тым ліку ТКП, якія ў адпаведнасці з заканадаўчымі актамі і пастановамі Саўміна будуць абавязковымі для выканання, падлягаюць абавязковай юрыдычнай экспертызе. "Гэта азначае, што ў распрацоўшчыка дакумента павінны быць вельмі важкія падставы абавязковасці прымянення прапанаваных патрабаванняў", - падкрэсліў Віктар Назаранка.
Перастануць быць абавязковымі тэхнічныя нарматыўныя прававыя акты СССР і БССР, якія рэгулююць парадак і ўмовы ажыццяўлення эканамічнай дзейнасці. Размова ідзе аб прынятых у той час кіруючых дакументах, галіновых стандартах, розных нормах і правілах, якія да гэтага часу прымяняюцца ў некаторых ведамствах.
Прадугледжана таксама зняцце абмежавання тэрміну дзеяння тэхнічных умоў на прадукцыю (работы, паслугі). Цяпер яго будзе вызначаць сам суб'ект гаспадарання. Ён таксама атрымлівае права не ўзгадняць тэхнічныя ўмовы і змяненні ў іх з дзяржаўнымі органамі.
Адрэгулявана і такое актуальнае пытанне, як выпрабаванні прадукцыі для ацэнкі адпаведнасці і атрымання дазвольных дакументаў. Гэта дасць магчымасць выключыць практыку, калі для выдачы дазвольных дакументаў упаўнаважаным органам прапаноўвалася праводзіць выпрабаванні прадукцыі толькі ў лабараторыі канкрэтнага ведамства. Цяпер суб'ект гаспадарання для гэтай мэты можа звярнуцца ў любую выпрабавальную лабараторыю, акрэдытаваную ў Нацыянальнай сістэме акрэдытацыі, незалежна ад ведамаснай падпарадкаванасці. Яна павінна мець адпаведную галіну акрэдытацыі і тэхнічныя магчымасці.
Згодна з дэкрэтам, будзе скарочаны пералік аб'ектаў абавязковага пацвярджэння адпаведнасці ў Нацыянальнай сістэме пацвярджэння адпаведнасці. Аптымізацыя закране таксама працэдуры пацвярджэння адпаведнасці, правядзення перыядычнай ацэнкі сертыфікаванага аб'екта. На выкананне гэтай работы адводзіцца тры месяцы.
"Дэкрэт аб развіцці прадпрымальніцтва - ёмісты і стратэгічны дакумент. На яго аснове трэба прымаць дакументы другога ўзроўню і разглядаць пытанні спрашчэння і стварэння ўмоў для вядзення бізнесу далей. Органы дзяржаўнага кіравання і ўсе іншыя задзейнічаныя структуры павінны рацыянальна скарыстацца гэтым дэкрэтам і развіваць яго", - лічыць Віктар Назаранка.
Абавязковымі застаюцца патрабаванні тэхнічных рэгламентаў Беларусі або Мытнага саюза і ЕАЭС. Гэтыя дакументы змяшчаюць аптымальныя патрабаванні бяспекі для жыцця і здароўя чалавека, навакольнага асяроддзя, забеспячэння энергаэфектыўнасці і рэсурсазберажэння, папярэджання дзеянняў, якія ўводзяць спажыўцоў у зман. Дзяржаўныя стандарты добраахвотныя для прымянення: суб'ект гаспадарання сам вырашае, карыстацца імі ці не. Абавязковым стандарт з'яўляецца, толькі калі на яго ёсць спасылка ў тэхрэгламенце або суб'ект гаспадарання ў добраахвотным парадку заявіў аб захаванні стандарту.
Прэзідэнт Беларусі Аляксандр Лукашэнка 23 лістапада падпісаў дэкрэт нумар 7 "Аб развіцці прадпрымальніцтва", які з'яўляецца ключавым дакументам з пакета нарматыўных прававых актаў па паляпшэнні бізнес-клімату ў краіне. Дакумент прызначаны надаць неабходны імпульс развіццю прадпрымальніцкай ініцыятывы, стымуляваць дзелавую актыўнасць грамадзян і ў цэлым палепшыць інвестыцыйны клімат у Беларусі.
