Беларусь у сярэднетэрміновай перспектыве следам за іншымі краінамі сутыкнецца з неабходнасцю распрацоўкі заканадаўчых норм рэгулявання абарачэння крыптавалют. Такое меркаванне выказаў карэспандэнту БЕЛТА намеснік старшыні Пастаяннай камісіі Палаты прадстаўнікоў па бюджэце і фінансах Валерый Барадзеня.
Паводле слоў парламентарыя, абарачэнне біткоінаў пашыраецца ў многіх краінах, запатрабаванасць віртуальных грошай расце. "Колькасць крыптавалют павялічваецца, расце іх абарот. І мы не можам заставацца ўбаку, - лічыць дэпутат. - Паколькі гэта ў тым ліку пытанне канкурэнтаздольнасці фінансавай сістэмы. Таму рана ці позна мы да гэтага прыйдзем".
Валерый Барадзеня адзначыў, што ў выпадку распрацоўкі заканадаўства аб крыптавалютах у Беларусі асноўныя механізмы могуць быць выпрацаваны на працягу 3-5 гадоў. "За гэты час, думаю, асноўныя акцэнты ў пытаннях абыходжання крыптавалют будуць расстаўлены", - выказаў ён меркаванне.
Крыптавалюта - гэта электронныя грошы, якія выкарыстоўваюцца ў якасці альтэрнатывы наяўнай валюце. Крыптавалюта не мае матэрыяльнага выражэння і эмітуецца толькі ў сетцы. Сёння, паводле розных ацэнак, у свеце налічваецца да 2 тыс. крыптавалют. Самая першая і папулярная сярод іх - біткоін.
