25 ліпеня, Барысаў /Кар. БЕЛТА/. Барысаўскаму заводу "Аўтагідраўзмацняльнік" трэба актыўней развіваць прамысловую кааперацыю з іншымі прадпрыемствамі. Такое меркаванне выказаў прэм'ер-міністр Андрэй Кабякоў, наведваючы прадпрыемства ў час выязнога Прэзідыума Савета Міністраў па пытаннях развіцця Барысаўскага раёна, перадае карэспандэнт БЕЛТА.
Прэм'ер-міністру далажылі аб планах па стварэнні сучаснай гібкай аўтаматызаванай вытворчасці вузлоў рулявога кіравання для камплектацыі аўтамабільнай тэхнікі. Кошт праекта - $34 млн, плануемыя тэрміны рэалізацыі - 2017-2020 гады.
Вывучаючы план тэхпераўзбраення прадпрыемства, Андрэй Кабякоў адзначыў, што "аўтагідраўзмацняльніку" трэба актыўней развіваць кааперацыю з іншымі прадпрыемствамі, каб пазбегнуць неабгрунтаваных трат на дарагое абсталяванне. "Усё, што можна зрабіць у кааперацыі з іншымі прадпрыемствамі, трэба праводзіць сумесна, у гэтым плане можна наладзіць супрацоўніцтва, напрыклад, з прадпрыемствам "Салеа". Трэба разумна падыходзіць да гэтага, загружаць абсталяванне, дзе гэта можна зрабіць, а не купляць новае. Кааперацыю трэба максімальна задзейнічаць, патэнцыял прадпрыемстваў Барысаўскага раёна, Мінскай вобласці гэта дазваляе, - лічыць кіраўнік урада. - Дакупляць трэба толькі тое абсталяванне, якое востра неабходна "Аўтагідраўзмацняльніку", але не больш".
Прэм'ер-міністр таксама даручыў правесці маніторынг рынку і вывучыць магчымасці дыверсіфікацыі вытворчасці. Сёння асноўныя спажыўцы прадукцыі завода - КамАЗ, аўтамабільныя заводы ГАЗ і "Урал", Ульянаўскі аўтамабільны завод, МТЗ, МАЗ.
Андрэй Кабякоў таксама наведаў завод "БелДжы", дзе азнаёміўся з ходам рэалізацыі інвестпраекта па зборцы легкавых аўтамабіляў. Прэм'ер-міністр пацікавіўся ўзроўнем лакалізацыі вытворчасці, планамі вытворчасці і продажаў на новым заводзе "БелДжы". Як далажылі кіраўніку ўрада, яго праектная магутнасць на першым этапе складзе 60 тыс. машын у год. З лістапада на тэрыторыі Беларусі плануецца вытворчасць рухавікоў унутранага згарання, што дасць магчымасць "БелДжы" да канца года выйсці на ўзровень лакалізацыі 30 працэнтаў. Андрэй Кабякоў асабіста праехаў за рулём аднаго з аўтамабіляў.-0-
