14 снежня, Мінск /Кар. БЕЛТА/. Прырост аб'ёмаў спажывання электраэнергіі ў Беларусі да 2020 года складзе 3 млрд кВт.гадз. Аб гэтым паведаміў сёння журналістам намеснік міністра энергетыкі Вадзім Закрэўскі, адказваючы на пытанне карэспандэнта БЕЛТА.
"Чаканы аб'ём (спажывання электраэнергіі. - Заўвага БЕЛТА) да 2020 года па аптымістычным сцэнарыі - каля 40 млрд кВт.гадз, гэта значыць прырост складзе 3 млрд кВт.гадз адносна бягучага года. У тым ліку трэба будзе набраць 2 млрд кВт.гадз за кошт рэальнага сектара эканомікі, насельніцтва і 1 млрд кВт.гадз - за кошт мер прэвентыўнага характару, рэалізацыю якіх узяло на сябе Міністэрства энергетыкі. Гэта неадкладныя папераджальныя мерапрыемствы, якія мы будзем рэалізоўваць на аб'ектах. Размова ідзе аб будаўніцтве электракатлоў, інакш кажучы пэўны аб'ём электрычнай энергіі будзем накіроўваць на цеплафікацыю, нагрэў сеткавай вады", - сказаў Вадзім Закрэўскі.
У 2016 годзе аб'ём электраспажывання ў Беларусі склаў 36,3 млрд кВт.гадз, па выніках 2017 года чакаецца 37 млрд кВт.гадз. Першы энергаблок БелАЭС плануецца ўвесці ў 2019 годзе, з выхадам на праектную магутнасць будзе забяспечаны рост прапанавання электрычнай энергіі адносна попыту. "Гэта дасць магчымасць загрузіць самыя эфектыўныя магутнасці, а неэфектыўныя - закансерваваць або вывесці з эксплуатацыі", - растлумачыў Вадзім Закрэўскі.
Намеснік міністра таксама падкрэсліў, што патэнцыял вытворчасці электрычнай энергіі ў Беларусі вялікі. "Неабходна забяспечыць зацікаўленасць спажыўцоў у выкарыстанні электраэнергіі. Рознымі праграмнымі дакументамі, у тым ліку па праграме "Камфортнае жыллё", мы стымулявалі развіццё размеркавальных электрычных сетак з тым, каб забяспечыць магчымасць падключэння ўсіх спажыўцоў да электрычнай энергіі", - сказаў ён.-0-
