9 сакавіка, Мінск /Юлія Огнева - БЕЛТА/. ААТ "Беларуская валютна-фондавая біржа" вызначана Нацыянальным форэкс-цэнтрам. Гэта вынікае з сумеснай пастановы Савета Міністраў і Нацыянальнага банка ад 4 сакавіка 2016 года нумар 177/8 "Аб вызначэнні Нацыянальнага форэкс-цэнтра і зацвярджэнні Палажэння аб дзейнасці Нацыянальнага форэкс-цэнтра", паведамілі карэспандэнту БЕЛТА ў прэс-службе беларускага ўрада.
"Беларуская валютна-фондавая біржа мае права ажыццяўляць дзейнасць па правядзенні аперацый, што ініцыіруюцца форэкс-кампаніямі, банкамі, нябанкаўскімі крэдытна-фінансавымі арганізацыямі, з беспаставачнымі пазабіржавымі фінансавымі інструментамі (дзейнасць на пазабіржавым рынку Форэкс) пасля прыняцця адпаведнага заканадаўчага акта", - гаворыцца ў пастанове.
Таксама дакументам зацверджана Палажэнне аб дзейнасці Нацыянальнага форэкс-цэнтра. Ім устанаўліваецца парадак дзейнасці Нацыянальнага форэкс-цэнтра (НФЦ) і яго фарміравання, у тым ліку ўнясення юрыдычнымі асобамі, зарэгістраванымі ў Беларусі, статутны фонд якіх сфарміраваны ў памеры не менш як Br2 млрд, і ўключанымі Нацыянальным банкам у рэестр форэкс-кампаній, банкамі, нябанкаўскімі крэдытна-фінансавымі арганізацыямі ўзносаў у гарантыйны фонд. Таксама вызначаны парадак вяртання ўнесеных сродкаў суб'ектамі пазабіржавага рынку Форэкс, гранічны памер выплат з гарантыйнага фонду фізічным і (або) юрыдычным асобам па абавязацельствах суб'ектаў пазабіржавага рынку Форэкс.
НФЦ будзе ажыццяўляць збор, сістэматызацыю, улік і захоўванне справаздачнасці аб усіх праводзімых суб'ектамі пазабіржавага рынку Форэкс аперацыях з беспаставачнымі пазабіржавымі фінансавымі інструментамі і прадстаўляць яе ў Нацыянальны банк. Таксама цэнтр будзе праводзіць аналіз прадастаўляемай суб'ектамі пазабіржавага рынку Форэкс справаздачнасці аб усіх праводзімых імі аперацыях, выяўляць парушэнні іх ажыццяўлення і інфармаваць аб такіх парушэннях рэгулятар. Акрамя таго, ён будзе аказваць на падставе дагавора на платнай аснове паслугі па рэгістрацыі, апрацоўцы даных, размяшчэнні інфармацыі і іншыя паслугі, звязаныя з ажыццяўленнем функцый.
Гарантыйны фонд фарміруецца НФЦ за кошт узносаў суб'ектаў пазабіржавага рынку Форэкс у доларах ЗША ў мэтах вяртання кліентам грашовых сродкаў у замежнай валюце пры немагчымасці выканання форэкс-кампаніямі сваіх абавязацельстваў па пагадненнях за кошт уласных сродкаў і забеспячальнага капіталу, а банкамі, нябанкаўскімі крэдытна-фінансавымі арганізацыямі - за кошт уласных сродкаў. Сродкі гарантыйнага фонду размяшчаюцца на бягучых (разліковых) банкаўскіх рахунках са спецыяльным рэжымам функцыянавання ў ААТ "Ашчадны банк "Беларусбанк". Суб'екты пазабіржавага рынку Форэкс абавязаны пералічаць у гарантыйны фонд уліковы ўзнос і каляндарныя ўзносы. Уліковым узносам прызнаецца сума, якая пералічаецца суб'ектам пазабіржавага рынку Форэкс на зваротнай аснове і падтрымліваецца ў гарантыйным фондзе ў памеры не менш як $55 тыс.
Гэта пастанова ўступае ў сілу з 7 сакавіка 2016 года.-0-
