6 жніўня, Мінск /Кар. БЕЛТА/. Экспарт будаўнічых паслуг у першым паўгоддзі бягучага года ў параўнанні з аналагічным перыядам 2017-га вырас на 15 працэнтаў і склаў $234 млн. Аб гэтым паведаміў 5 жніўня ў эфіры тэлеканала СТБ міністр архітэктуры і будаўніцтва Анатоль Чорны, паведамляе БЕЛТА.
Беларускія будаўнікі працуюць у еўрапейскіх краінах, сказаў ён. Ужо створана прадпрыемства па будаўніцтве жылля ў Венгрыі. Вядзецца ўзвядзенне жылля ў краінах Балтыі. Але Расія сёння застаецца ў прыярытэце. "У Калужскай вобласці ўведзена ў эксплуатацыю школа на 1 тыс. месцаў, пабудаваны дзіцячы дом. У бягучым годзе пачата будаўніцтва яшчэ адной школы ў Калузе на 1 тыс. месцаў. І такі ж праект разглядаецца ў Комі ў Сыктыўкары. Гэта будаўніцтва школы на 600 месцаў і на 1 тыс. 200", - адзначыў Анатоль Чорны.
Гаворачы ў цэлым аб выніках работы за першае паўгоддзе, кіраўнік ведамства паведаміў, што за шэсць месяцаў выканана будаўніча-мантажных работ на Br5 млрд. 130 млн. "Да ўзроўню мінулага года гэта склала 108,4 працэнта - дастатковы рост. Сёння мы на трэцім месцы па ўкладзе ў ВУП, наперадзе толькі апрацоўчая прамысловасць і аптовы гандаль", - сказаў міністр.-0-
