27 сакавіка, Мінск /Кар. БЕЛТА/. Выстаўка да 85-годдзя акадэмічнага Вялікага тэатра оперы і балета Беларусі знаёміць з яго навейшай гісторыяй. Аб гэтым паведаміў сёння на адкрыцці выстаўкі ў галерэі "Універсітэт культуры" генеральны дырэктар тэатра Уладзімір Грыдзюшка, перадае карэспандэнт БЕЛТА.
Паводле слоў Уладзіміра Грыдзюшкі, у экспазіцыю "Тэатр. Inside" ўключаны эскізы дэкарацый, сцэнічныя касцюмы, афішы і плакаты, тэатральная бутафорыя і фатаграфіі, якія прадстаўляюць навейшую гісторыю Вялікага тэатра Беларусі. Тэатра, які з'яўляецца візітнай карткай краіны.
Азнаёміцца з выстаўкай з 28 сакавіка да 10 красавіка змогуць усе жадаючыя, уваход на выстаўку свабодны. Пасля заканчэння работы выстаўкі ў галерэі "Універсітэт культуры" экспанаты пераедуць у Нацыянальную бібліятэку Беларусі, а пазней яна будзе прадстаўлена ў самім Вялікім тэатры, расказаў Уладзімір Грыдзюшка.
Экспануецца серыя эскізаў і касцюмаў да опер "Аіда" і "Набука" Джузэпэ Вердзі, балетаў "Каханне і Смерць" Палада Бюльбюль аглы і "Санеты" на музыку Пітэра Уорлака і Ральфа Воана-Уільямса. У асобнай зале прадстаўлена яркая візуальная інфармацыя пра спектаклі Вялікага тэатра Беларусі, якія былі ўдастоены высокіх дзяржаўных узнагарод: оперы "Сівая легенда" Дзмітрыя Смольскага і "Царская нявеста" Мікалая Рымскага-Корсакава, балеты "Вітаўт" Вячаслава Кузняцова і "Маленькі прынц" Яўгена Глебава.
Аўтары новага балета беларускага кампазітара Вячаслава Кузняцова "Анастасія", прэм'ера якога адбудзецца ў наступным сезоне, прыадкрылі тайну - наведвальнікі выстаўкі ўбачаць эскізы касцюмаў да гэтага спектакля.
Работа з дзецьмі - будучым пакаленнем тэатральных гледачоў - важнейшая частка дзейнасці беларускага Вялікага тэатра. Таму асобная зала галерэі прысвечана дзіцячаму рэпертуару, маленькія гледачы змогуць убачыць касцюмы, бутафорыю і маляўнічыя афішы да спектакляў "Віні-Пух" і "Айбаліт", "Чароўная музыка", "Церам-Церамок" і г. д.
Выстаўка "Тэатр. Inside" арганізавана Вялікім тэатрам Беларусі і галерэяй "Універсітэт культуры".-0-
Фота Генадзя Жынкова
