Беларус Румянцаў стаў бронзавым прызёрам юнацкага першынства свету па боксе

1 лістапада, Мінск /Кар. БЕЛТА/. Беларускі баксёр Андрэй Румянцаў заваяваў медаль першынства свету сярод юнакоў і дзяўчат да 18 гадоў, які праходзіць у чарнагорскай Будве, паведамілі БЕЛТА ў прэс-службе Мінспорту.

Наш спартсмен стаў прызёрам у вагавой катэгорыі да 86 кілаграмаў. У першым крузе беларус перамог Бакытжана Аітмухаева з Казахстана, у наступным раўндзе быў мацнейшы за Каджаджыку Лісі з Паўночнай Македоніі, а ў чвэрцьфінале адолеў балгарына Стаяна Пятрова. Сапернікам Румянцава па паўфінале павінен быў стаць расіянін Каміль Джамаеў, але з-за траўмы кісці Андрэй не быў дапушчаны ўрачом да бою. Такім чынам, наш баксёр аўтаматычна стаў уладальнікам бронзы, паколькі паядынкі за трэцяе месца на турніры не праводзяцца.

Беларускую каманду ў Будве прадстаўлялі пяцёра спартсменаў. Яўген Гарбачоў (да 63,5 кг), Андрэй Мацкевіч (да 75 кг) дайшлі да 1/8 фіналу, а Іван Сіняк (да 71 кг) і Кірыл Гарбаценка (да 80 кг) спыніліся на стадыі 1/16 фіналу. Усяго ў Чарнагорыі выступілі каля 600 юных баксёраў з 73 краін. Юнакі вызначылі мацнейшых у трынаццаці катэгорыях, дзяўчаты разыгралі медалі ў дванаццаці вагах.-0-