Законапраект аб дзяржаўным і мабілізацыйным матэрыяльных рэзервах прыняты ў другім чытанні

10 студзеня, Мінск /Кар. БЕЛТА/. Дэпутаты на пасяджэнні другой сесіі Палаты прадстаўнікоў  Нацыянальнага сходу восьмага склікання прынялі ў другім чытанні законапраект "Аб змяненні Закона Рэспублікі Беларусь "Аб дзяржаўным і мабілізацыйным матэрыяльных рэзервах", перадае карэспандэнт БЕЛТА.

Праект закона ўнесены Саветам Міністраў 19 чэрвеня 2024 года і прыняты ў першым чытанні 2 кастрычніка 2024 года. Ён распрацаваны ў мэтах удасканалення парадку стварэння і забеспячэння захаванасці дзяржаўнага і мабілізацыйнага матэрыяльных рэзерваў.

Праектам закона ўводзіцца шэраг новых тэрмінаў і іх азначэнняў: "незабеспячэнне колькаснай захаванасці рэзерваў", "незабеспячэнне якаснай захаванасці рэзерваў", "арганізацыя, адказная за асвяжэнне і (або) замену рэзерваў". Замацоўваюцца паўнамоцтвы Прэзідэнта Рэспублікі Беларусь на ўстанаўленне асаблівасцей прававога рэгулявання адносін у галіне рэзерваў. Пашыраецца пералік мэт прызначэння і выкарыстання рэзерваў матэрыяльных рэсурсаў.

Змяняецца парадак выпуску матэрыяльных каштоўнасцей з дзяржаўнага і мабілізацыйнага матэрыяльных рэзерваў. Прадугледжваецца магчымасць прыцягнення для перавозкі матэрыяльных каштоўнасцей не толькі транспартных арганізацый, але і іншых арганізацый, якія маюць на балансе транспартныя сродкі для перавозкі грузаў. Канкрэтызуюцца меры адказнасці за парушэнні абавязацельстваў па аперацыях з матэрыяльнымі каштоўнасцямі дзяржаўнага і мабілізацыйнага матэрыяльных рэзерваў. Рашэнням Дзяржрэзерву аб спагнанні штрафаў, пеняў, платы за запазычванне матэрыяльных каштоўнасцей надаецца статус выканаўчага дакумента.-0-