Выхад на лёд і выкарыстанне петард. МУС нагадала аб рызыках для дзяцей у час зімовых канікулаў

26 снежня, Мінск /Кар. БЕЛТА/. З пачаткам зімовых канікулаў фіксуецца больш здарэнняў з удзелам непаўналетніх на дарогах і ў месцах канцэнтрацыі дзяцей. У гэты перыяд многія хлопчыкі і дзяўчынкі праводзяць значны час без нагляду дарослых, таму важна пастаянна паўтараць асновы бяспекі, паведамілі БЕЛТА ў праваахоўным ведамстве.

"Асабліва актуальна нагадаць аб неабходнасці выконваць правілы дарожнага руху, нормы паводзін у грамадскіх месцах, прагаварыць наступствы выхаду на лёд. Таксама з высокай рызыкай звязаны гульні і свавольства на аб'ектах чыгуначнага транспарту, выкарыстанне піратэхнічных вырабаў", - звярнулі ўвагу праваахоўнікі.

У МУС таксама нагадалі, што за прымяненне петард і феерверкаў, якое парушае грамадскі парадак або спакой грамадзян, прадугледжана адміністрацыйная адказнасць. Знаходжанне непаўналетніх ва ўзросце да 16 гадоў у начны час па-за домам без суправаджэння дарослых не дапускаецца. "Бацькі павінны разумець: каб навучыць дзіця правільным і бяспечным паводзінам, трэба самім паказваць адпаведны прыклад. Таксама важна быць у курсе, дзе і з кім праводзіць час падлетак", - падкрэслілі вартавыя парадку.

Акрамя таго, у час зімовых канікулаў супрацоўнікі органаў унутраных спраў правядуць комплекс мерапрыемстваў па папярэджанні правапарушэнняў з боку непаўналетніх і надзвычайных здарэнняў з іх удзелам.-0-