28 чэрвеня, Мінск /Кар. БЕЛТА/. Усе тэмы, якія сёння хвалююць насельніцтва, асабліва рэзанансныя, знаходзяцца на кантролі Адміністрацыі Прэзідэнта, заявіла журналістам кіраўнік Адміністрацыі Наталля Качанава, каменціруючы паведамленні асобных СМІ, у прыватнасці па пытанні скарачэння дэкрэтнага водпуску ў Беларусі, паведамляе БЕЛТА.
"Што датычыцца гэтага пытання, на праведзенай у лютым нарадзе Прэзідэнт, наадварот, даручыў вызначыць новыя эфектыўныя меры, якія зменяць існуючую дэмаграфічную сітуацыю. Асаблівую ўвагу было даручана ўдзяліць забеспячэнню шматдзетных сем'яў жыллём. Напрамкі дзяржаўнай падтрымкі, якія даюць эфект, павінны быць узмоцнены. Ураду даручана ўнесці адпаведныя прапановы па выкананні пастаўленых задач", - сказала Наталля Качанава.
Паводле яе слоў, Адміністрацыя сёння практыкуе ўсе магчымыя метады і формы маніторынгу сітуацыі на месцах, і ніводная тэма, хвалюючая грамадзян, не застаецца без увагі. Вышэйшыя службовыя асобы, у тым ліку кіраўнік Адміністрацыі асабіста, наведваюць пасяджэнні выканкамаў, дзе мясцовым органам улады даводзяць даручэнні кіраўніка дзяржавы, перш за ўсё накіраваныя на павышэнне дабрабыту грамадзян і актывізацыю работы вертыкалі з насельніцтвам.
Адказваючы на пытанне журналістаў аб сітуацыі з будаўніцтвам акумулятарнага завода ў Брэсце, Наталля Качанава адзначыла, што першапачаткова гэта тэма знаходзілася ў кампетэнцыі мясцовых органаў улады, паколькі на іх узроўні заключаўся інвестыцыйны дагавор. "Таму кіраўніком дзяржавы была дадзена магчымасць на працягу пэўнага часу разабрацца з гэтым праблемным пытаннем на месцы, - растлумачыла кіраўнік Адміністрацыі. - Аднак на гэты час сітуацыя пакуль не ўрэгулявана. З улікам таго кампетэнтным органам даручана больш глыбока і дэталёва разабрацца з сітуацыяй. Па выніках разгляду будуць прыняты пэўныя рашэнні".
Наталля Качанава запэўніла, што аб усіх такіх праблемных тэмах кіраўнік дзяржавы інфармаваны, ён самым сур'ёзным чынам адсочвае інфармацыю, якая яму прадастаўляецца. Кіраўнік Адміністрацыі дадала, што вырашэнне такіх пытанняў не церпіць валакіты, яны павінны разглядацца больш аператыўна, каб не выклікаць незадаволенасці або сацыяльнай напружанасці ў грамадстве.-0-
